Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 341 Hüküm no: 367 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed nafaka ve diğer alacaklarından feragat ederek kocası Abdülbâki Bey b. Mehmed’den boşanıp birbirlerinin zimmetlerin ibra ettikleri Fi’l-asl vilâyet-i Anadolu’da Kengiri sancağında …? kazâsına tâbi‘ Okçular nâm karye sâkinelerinden olup hâlâ kasaba-i Kasım Paşa’da Debbâğhâne Mahallesi’nde sâkine ve zâtını ma‘rifet-i şer‘iyye ile ârifân Mehmed Efendi b. Mustafa ve Oruc Bey b. Sefer nâm kimesneler ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i şerîf-i enverde zevci Abdülbâki Bey b. Mehmed tarafından husûs-ı âti’l-beyânı tasdîka vekîl olduğu Abdullah Ağa b. Hüseyin ve Mustafa Bey b. İbrahim şehâdetleriyle şer‘an sâbit olan Mahmud Bey b. Mehmed muvâcehesinde bi-tav‘ihâ ikrâr ve takrîr-i kelâm edip müvekkil-i mezkûr Abdülbâki Bey zevcim olup zimmetinde mütekarrer ve ma‘kūdün-aleyh olan otuz iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere vekîl-i mezkûr ile muhâla‘a-i sahîha-i şer‘iyye ile hul‘ olup vekîl-i mezbûr dahi hul‘-ı mezbûru kabûl eylediğinden sonra hukūk-ı zevciyete ve hîn-i akidde mehr-i müeccel olmak üzere tesmiye olunan iki yüz elli guruş kıymetli câriye da‘vâsından ve kırk miskāl bir çift altın bilezik da‘vâsından ve sâir beynimizde cereyân eden ahz u i‘tâ ve mu‘âmelât-ı şettâ da‘vâsından zevcim müvekkil-i mezkûrun zimmetini ibrâ-i âmm-ı râfi‘u’l-hısâm ile ibrâ ve iskāt edip vekîl-i mezbûr dahi vech-i muharrer üzere benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Ali Ağa b. Süleyman Alaybeyi, Salih Bey b. Abdurrahman Efendi, Abdullah Bey b. Mustafa, Hidayetullah b. el-Hâc Osman, Ali Çelebi b. Salih, Hasan Bey b. Ahmed, Şeyhzâde Ahmed Çelebi b. Mustafa, Abdullah Efendi Sofyalı, Feyzullah Efendi, Ahmed Çelebi b. Süleyman, Mahmud Efendi el-Kādı, Çolak Süleyman Bey an-mahalle-i Tercümân Yunus, Mustafa Çelebi b. Şa‘ban