Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 342 Hüküm no: 368 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi b. Ebûbekir’in Hoca Hamza Vakfı’ndan kiraladığı arsa üzerine mütevellî izniyle yaptırdığı binayı vakfettiği İmzâ-yı hazret-i efendi Mahmiye-i İstanbul’da Hoca Paşa Mahallesi’nde sâkin Hüseyin Çelebi b. Ebûbekir nâm kimesne mahfil-i kazâda mahmiye-i mezbûrede Hoca Hamza Mahallesi imâmı ve mütevellîsi olan işbu râfi‘u’l-vesîka Mustafa Efendi b. Mehmed nâm kimesne mahzarında ikrâr ve takrîr-i kelâm edip mahmiye-i mezbûrede Hızır Bey Mahallesi’nde vâki‘ bir tarafdan Cevvîzâde Vakfı olan odalar ve bir tarafdan Keyvan Ağa Vakfı olan odalar ve bir tarafdan İsa Çavuş odaları ve bir tarafdan tarîk-i hâs ile mahdûd arsasının Cevvîzâde Vakfı’ndan mâ‘adâsının gallesi Hoca Hamza imâmlarına meşrûta vakıf olmağla mezbûr Mustafa Efendi bi’t-tevliye Hoca Hamza imâmlarına meşrûta olan arsa-yı mezkûremi senede üç yüz altmış akçe mukāta‘a ile bana îcâr ve teslîm ve üzerine mülküm olmak üzere binâya bana izin verip ben dahi ber-vech-i muharrer istîcâr ve kabûl ve üzerine mülküm olmak üzere ebniye ihdâs edip ebniye-i mezkûreyi cihet-i uhrâya vakıf eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 9 min-Cumâdelâhire sene 1121 Şuhûdü’l-hâl: Ya‘kub Efendi b. İsa, Mehmed b. Ali, Süleyman b. Osman, el-Hâc Mustafa Efendi b. ( ), Mehmed Çelebi b. Abdullah, Ali Çelebi b. İvaz el-Muhzır ve gayruhum mine’l-huzzâr.