Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 349 Hüküm no: 376 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın geçinemediği kocası Mehmed b. Hüseyin’den boşandığı Mahmiye-i İstanbul’da Mesîh Paşa Mahallesi’nde sâkine olup zâtı Ali b. Hüseyin ve Ahmed b. Ali nâm kimesneler ta‘rîfleriyle mu‘arrefe olan Fâtıma bt. Mustafa nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mehmed b. Hüseyin nâm kimesne mahzarında ikrâr ve takrîr-i kelâm edip zevcim mezbûr Mehmed ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed ile muhâla‘a eylediğimde ol dahi hul‘-ı mezbûru kabûl eylediğinde hukūk-ı zevciyete ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika cemî‘ de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Cumâdelâhire sene 1121 Şuhûdü’l-hâl: Abdullah Çelebi b. Mustafa, Mustafa Çelebi b. Şa‘ban, Süleyman Çelebi b. Abdullah, İvaz b. Abdullah, Ali b. Bâli ve gayruhum mine’l-huzzâr.