Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 349 Hüküm no: 377 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah Efendi’nin babasından intikal eden eşya ve parasını vasisi Şa‘ban Efendi b. Mehmed’den teslim alıp zimmetini ibra ettiği Mahmiye-i İstanbul’da Hoca Üveys Mahallesi’nde sâkine sin ve cüssesinin bülûğa tahammülü ve bülûğuna mu‘terife olup bi-nefsihâ kendi eşyâsını zabt ve hıfza kādire ve reşide olduğu zeyl-i kitâbda muharrerü’l-esâmî bî-garaz Müslimîn ihbârlarıyla lede’ş-şer‘i’l-enver zâhir ve müte‘ayyin olan Âişe bt. Abdullah Efendi nâm bikr mahfil-i kazâda bundan akdem hâl-i sıgārında tesviye-i umûruna vasiyy-i muhtârı olan işbu râfi‘u’l-vesîka Şa‘ban Efendi b. Mehmed nâm kimesne mahzarında ikrâr ve takrîr-i kelâm edip merkūm Şa‘ban hâl-i sıgārımda tesviye-i umûruma vasiyy-i muhtârım olmağla babam müteveffâ-i mezbûrun cemî‘ terekesinden ber-mûceb-i defter-i kassâm-ı askerî nâtıka olduğu üzere bana isâbet eden hissemden para dörder akçe hesâbı üzere makbûzu olan on sekiz bin dört yüz doksan iki akçe ile benim emrim üzere yine mecmû‘u on sekiz bin dört yüz doksan iki akçe kıymetli bir Mushaf-ı şerîf ve bir kumaş yorgan ve iki Acem yan keçesi ve bir kırmızı velençe ve iki serâser yasdık ve bir bez perde ve üç çârşeb ve bir hasır makramesi ve bir havlu makrame ve bir silecek ve iki beledî yasdık ve dört minder ve bir tâbe ve iki kefkir kefçe ve bir leğen ma‘a ibrik ve bir sagīr tepsi ve bir sagīr kazgan ve altı sahan ma‘a kapak ve üç tencere ma‘a kapak ve bir maşraba ve bir şam‘dân ve iki beledî döşek ve iki Acem yemenisi yorgan ve yine Tokat yemenisi iki yorgan ve üç kahve ibriği ve bir hoşâb tası ve bir kebîr güğüm ve bir kahve tepsisi ve üç sagīr lengerî ve yedişer ayaklı bir çift incili küpe ve bir kadife yasdık ve bir köhne kumaş mak‘ad ve yedi yasdık gılâfı ve bir köhne orta keçesi ve üç top keten bezi ve bir incili serpûş benim için cihâz olmak üzere iştirâ edip eşyâ-i muharrere-i mezkûreyi bana def‘ ü teslîm ben dahi yedinden tamamen ahz u kabz eyledim baʻde’l-yevm defterde mezkûr olan on sekiz bin dört yüz doksan iki akçeden ve târih-i kitâba gelince babam müteveffâ-i mezbûrun sâir kalîl ü kesîr terekesinden vasiyy-i mezbûr Şa‘ban Efendi’nin yedinde ve kıbelinde bir akçe ve bir habbe kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Cumâdelâhire sene 1121 Şuhûdü’l-hâl: İbrahim Efendi b. Mehmed İmâm, Mustafa Efendi b. eş-Şeyh Hasan Efendi, Sandalî Ahmed Çelebi b. Mustafa, Hüseyin Efendi b. Ahmed, İvaz Çelebi b. Abdullah, Müezzin Mustafa Efendi b. Musa, Mi‘mâr Ayas ve gayruhum mine’l-huzzâr.