Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 350 Hüküm no: 378 Orijinal metin no: [51b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Mehmed’in evini istiğlal yolu ile Dergâh-ı âlî yeniçerileri Yirmi Beşinci Cemâati odası para vakfına satıp tekrar kiraladığı Mahmiye-i İstanbul’da Keçeci Pîrî Mahallesi’nde sâkin Hüseyin Beşe b. Mehmed nâm kimesne mahfil-i kazâda Dergâh-ı âlî yeniçerilerinin Yirmi beşinci Cemâ‘ati’ne mahsûs oda mühimmâtına mevkūfe nukūdun bi’l-fi‘il mütevellîsi olan işbu râfi‘u’l-kitâb Ahmed Beşe b. Abdullah nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan yine mahalle-i mezbûre mescid-i şerîfi vakfı musakkafâtından olup ( ) tasarrufunda olan menzil ve bir tarafdan Ahmed Efendi menzili ve bir tarafdan Halimzâde kerîmesi bahçesi ve bir tarafdan tarîk-i âm ile mahdûd büyût-ı adîdeyi müştemile mülk menzilimi mezbûr Ahmed Beşe’ye bi-tarîkı’l-istiğlâl kırk guruşa bey‘ ve teslîm ol dahi mâl-ı vakf-ı mezbûr ile bi’t-tevliye iştirâ ve tesellüm edip semeni olan meblağ-ı mezbûr kırk guruşu mütevellî-i mezbûr yedinden tamamen ahz u kabz eylediğimden sonra mütevellî-i mezbûr yine menzil-i mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yine bana altı guruşa bi’t-tevliye îcâr [52a] ve teslîm ben dahi istîcâr ve tesellüm eyledim dedikde gıbbe’t-tasdîkı’l-mer‘î mezbûr Hüseyin Beşe mahfil-i kazâda Ali Ağa b. Yusuf mahzarında ikrâr ve takrîr-i kelâm edip menzil-i mezbûr hakīkatde rehin ve meblağ-ı mezbûr deyn olmağla asl-ı mâl-ı mezbûr kırk guruş ile ücret-i mezkûre altı guruş ki cem‘an kırk altı guruşu müddet-i mezbûre tamamında edâ müyesser olmaz ise menzil-i mezbûru semen-i misli ile âhara bey‘ ve kabz-ı semene ve semen-i mezbûrdan deyn-i mezbûru edâ ve fazla kalır ise bana îsâle ve mezbûrun mütevakkıf olduğu umûrun küllîsine akd-i rehnde meşrûta küllemâ azeltüke fe-ente vekîlî mazmûnu üzere azl ve in‘izâlden masûne vekâlet-i devriye ile mezbûr Ali Ağa’yı tarafımdan vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve merâsimini edâya müte‘ahhid olmağın mâ-vaka‘a bi’t-taleb ketb olundu. Fî 7 min-Cumâdelâhire sene 1121 Şuhûdü’l-hâl: el-Hâc Mustafa b. Ömer, İbrahim Efendi b. el-Hâc Mustafa, Mehmed Çelebi b. Osman, İsmail Çelebi b. İbrahim, Ahmed Efendi b. Osman, Mustafa Çelebi b. Şa‘ban, Ali b. Bâli, Abdülkerim b. Ahmed ve gayruhum mine’l-huzzâr.