Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 351 Hüküm no: 379 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Hacı Yusuf ile kocası Halil b. Şeyhî Mehmed Efendi’nin Ördekviran köyündeki bağlarını Abdullah Çelebi b. Mehmed’e sattıkları Medîne-i Üsküdar nevâhîsinden Ada nâhiyesine tâbi‘ Ördekviran nâm karye sükkânından Hadice Hatun bt. el-Hâc Yusuf ile mezbûrenin zevci Halil b. Şeyhî Mehmed Efendi nâm kimesne meclis-i şer‘de işbu râfi‘u’l-kitâb Abdullah Çelebi b. Mehmed mahzarında her biri ikrâr ve takrîr-i kelâm edip karye-i mezbûrede vâki‘ bir tarafdan el-Hâc Mustafa bağı ve bir tarafdan el-Hâc Halil bağı ve bir tarafdan yine kendi mülkümüz olan bostan ve bir tarafdan tarîk-i âm ile mahdûd tahmînen elli dönüm mülk bağımızı mezbûr Abdullah Çelebi’ye târih-i kitâbdan bir sene tamamına değin bey‘ bi’l-vefâ tarîkı üzere iki yüz elli guruşa bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr iki yüz elli guruşu her birimiz bi-kadri’l-hısas mezbûr Abdullah Çelebi yedinden tamamen ahz u kabz eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Sebzeci es-Seyyid Abdullah Çelebi b. es-Seyyid Ahmed, Hasan Beşe b. Mehmed, Berber İbrahim Çelebi b. Osman, Mehmed Yazıcı b. İsmail, el-Hâc Mustafa b. Mehmed, Helvacı Mehmed Çelebi b. Ramazan, İsmail Beşe an-karye-i mezbûr ve gayruhum mine’l-huzzâr.