Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 352 Hüküm no: 380 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Hacı Osman ile boşandıkları kocası Numan Çavuş Halîfe b. Abdülbârî’nin birbirleriyle olan alacak-verecek davasında sulh oldukları Mahmiye-i İstanbul’da Beyceğiz Mahallesi sâkinelerinden Hadice Hatun bt. el-Hâc Osman tarafından husûs-ı âti’l-beyânı ikrâra vekîl olduğu zât-ı mezkûreyi ma‘rifet-i şer‘iyye ile ârifân Mustafa Çelebi b. Ahmed ve Molla Halil b. Ali şehâdetleriyle şer‘an sâbit olan es-Seyyid İbrahim Efendi b. es-Seyyid Mehmed nâm kimesne meclis-i şer‘-i şerîf-i enver ve mahfil-i dîn-i münîf-i ezherde müvekkile-i mezkûrenin zevc-i sâbıkı işbu râfi‘u’l-vesîka Numan Çavuş Halîfe b. Abdülbârî muvâcehesinde bi’l-vekâle ikrâr ve takrîr-i kelâm edip mezkûr Numan Çavuş müvekkilem mezkûrenin zevci olup zimmetinde mütekarrer ve ma‘kūdün-aleyh <> yüz guruş mehr-i müecceli ve nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere hul‘ ve mezkûr Numan Çavuş dahi ber-vech-i meşrûh hul‘-ı mezkûru kabûl ve hukūk-ı zevciyete müte‘allika da‘vâdan mezkûr Numan Çavuş’un zimmetini ibrâ-i âm ile ibrâ ve iskāt etmişidi lâkin müvekkilem mezkûre merkūm Numan Çavuş’dan beynlerinde ma‘lûm menzil icâresinden yüz yirmi guruş ve halîfe oldukda karz-ı hasen aldığı iki yüz altmış guruş ve yüz seksen guruş kıymetli bir re’s câriyemi katl eyledin deyü meblağ-ı mezkûr yüz seksen guruş ve beynlerinde ma‘lûm bir husûs için verdiği on beş guruş ve dükkân semeninden olan otuz guruş ve Lütfi nâmında iştirâ eylediği câriye için ahz u kabz eylediği on guruş ki cem‘an altı yüz on beş guruş ile beynlerinde kıymetleri ma‘lûm bir oda döşemesini mezkûr Numan Çavuş’dan taleb ve da‘vâ eyledikde ol dahi inkâr eylediğinden mâ‘adâ müvekkilem mezkûreden emriyle kendi menzili meremmetine sarf eylediğim on guruş ve bir senede her ulûfe çıkdıkda verdiğim altmış dört guruş ve bilezik tebdîlinde verdiğim on beş guruş ve sagīre câriyesi fevt oldukda emriyle harc u sarf eylediğim on iki buçuk guruş ve sekiz guruş kıymetli bir dülbend örtüsü ve on guruş kıymetli hamam rahtı ve cihet-i karzdan yüz guruş ki cem‘an iki yüz yirmi sekiz buçuk guruş hakkım vardır deyü müvekkilem mezkûreden taleb ve da‘vâ etmekle beynlerinde nizâ‘-ı küllî vukū‘undan sonra muslihûn tavassut edip müvekkilem mezkûreyi merkūm Numan Çavuş ile doksan guruş üzerine sulh eylediklerinde tarafeynden her biri ber-vech-i meşrûh sulh-ı mezbûru kabûl ve bedel-i sulh olan meblağ-ı mezbûr doksan guruşu müvekkilem mezkûre merkūm Numan Çavuş yedinden tamamen ahz u kabz eylediğinden sonra hukūk-ı zevciyete ve gayra ve bi’l-cümle târih-i kitâba gelince beynlerinde cereyân eden ahz u i‘tâ ve mu‘âmelât-ı şettâya ve celîl ü hakīr ve kalîl ü kesîr sâir hukūk-ı ma‘lûme ve mechûleye müte‘allika âmme-i da‘vâdan her biri âharın zimmetini ibrâ-i âmm-ı râfi‘u’l-hısâm ibrâ ve iskāt eylediler baʻde’l-yevm birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ları kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 min-Cumâdelâhire sene 1121 Şuhûdü’l-hâl: Hüseyin Efendi b. Hasan Efendi, Osman Çelebi b. Mustafa, Emrullah Çelebi b. Mehmed, Monla Mehmed b. İsmail, Halil b. Ali, Ali Efendi b. Abdi, Ahmed b. Halil, Mustafa b. Mehmed, Mustafa Beşe el-Mübâşir, Mustafa b. Hüseyin ve gayruhum mine’l-huzzâr.