Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 353 Hüküm no: 381 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdi mehir bedelinin bir kısmını kocasına hibe ettikten sonra vasiyet edip vasiyeti için de yine kocası İbrahim b. Mehmed’i vasi tayin ettiği Mahmiye-i İstanbul’da Akşemseddin Mahallesi’nde sâkine olup zâtı ma‘rifet-i şer‘iyye ile ârifân Hüseyin b. Receb ve Mustafa b. İbrahim nâm kimesneler ta‘rîfleriyle mu‘arrefe olan Âişe bt. Abdi nâm hatun mahfil-i kazâda zevc-i dâhili işbu râfi‘u’l-kitâb İbrahim b. Mehmed nâm kimesne mahzarında ikrâr ve takrîr-i kelâm edip zevcim mezbûr İbrahim zimmetinde mütekarrer ve ma‘kūdün-aleyh olan elli guruş mehr-i müeccelimin yirmi guruşunu zevcim mezbûr İbrahim’e hibetü’d-deyn mimmen aleyhi’d-deyn-i sahîha mazmûnu üzere hibe-i sahîha-i şer‘iyye ile hibe eylediğimde ol dahi meclis-i hibede ittihâb ve kabûl eyledi dedikde gıbbe’t-tasdîkı’l-mer‘î mezbûr[e] Âişe yine meclis-i mezbûrda zevci mezbûr İbrahim muvâcehesinde ikrâr ve takrîr-i kelâm edip ben bi-emri’llâhi te‘âlâ vefât eylediğimde zevcim mezbûr İbrahim cemî‘ eşyâmı bi’l-vesâye ahz u kabz eyleyip sülüsünü ifrâz ve sülüs-i mezkûrdan iki Mushaf-ı şerîf iştirâ ve birer müstehak ehl-i Kur’ân kimesnelere verip kırâet eyledikde sevâbını zevcim ve ervâh-ı müminîne ihdâ eyleye ve iskāt-ı salât ve eyyâm-ı mu‘tâdede tabh-ı ta‘âm ve it‘âm-ı fukarâ-yı Müslimîn edip bunlardan fazla sülüs-i mezkûrdan her ne kalır ise sâir vücûh-ı birre sarf eyleye deyü vasiyet edip tenfîzine zevcim mezbûr İbrahim’i vasiyy-i muhtâr nasb ve ihtiyâr eyledim dedikde ol dahi vesâyet-i mezbûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: İmâm Halil Efendi b. Mustafa, Müezzin Mehmed Çelebi b. Halil, Mehmed b. Ahmed Odabaşı, Hüseyin b. Mustafa, Ömer b. Ahmed, Hüseyin b. Mustafa, Mustafa b. İbrahim, Hüseyin b. Receb ve gayruhum mine’l-huzzâr.