Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 354 Hüküm no: 382 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duacızâde Abdullah Efendi b. Mustafa b. Himmet’in vârislerinden kızı Ayşe’nin babasından intikal eden odadaki hissesini Ayşe Hatun bt. Abdullah’a sattığı Mahmiye-i İstanbul’da Hoca Üveys Mahallesi’nde sâkin iken bundan akdem vefât eden Duâcızâde Abdullah Efendi b. Mustafa b. Himmet’in verâseti zevce-i metrûkesi Râbia bt. Ahmed nâm hatun ile sulbiye kebîre kızı Âişe’ye ve li-ebeveyn ammi oğlu İsmail b. Osman’a münhasıra ve tashîh-i mes’elesi sekiz sehmden olup sihâm-ı mezbûreden bir sehmi mezbûre Râbia’ya ve dört sehmi mezkûre Âişe’ye [52b] ve üç sehmi mezbûr İsmail’e isâbet eylediği şer‘an zâhir ve mütehakkık oldukdan sonra mezkûre Âişe’nin zâtı ma‘rifet-i şer‘iyye ile ârifân Sandalî Ahmed Çelebi b. Mustafa ve Mustafa Efendi b. eş-Şeyh Hasan Efendi ta‘rîfleriyle mu‘arrefe ve sin ve cüssesinin bülûğa tahammülü ve bülûğunu mu‘terife olan mezkûre Âişe mahfil-i kazâda işbu râfi‘atü’l-vesîka diğer Âişe Hatun bt. Abdullah mahzarında ikrâr ve takrîr-i kelâm edip babam müteveffâ-i mezbûrun ile’l-vefât mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd sâkin olduğu mülk menzile muttasıl bir bâb fevkānî odanın arsası müşteri-i mezbûr Âişe’nin zevci Şa‘ban Efendi’ye meşrûta olup lâkin ebniyesi babam müteveffâ-i mezbûrun ile’l-vefât yedinde mülk ve hakkı olmağla oda-i mezkûreden tashîh-i mezkûr üzere bana isâbet eden dört sehm hisse-i şâyi‘amı cemî‘ tevâbi‘iyle tarafeynden îcâb ve kabûlü hâvî bey‘-i kat‘î ile mezkûre diğer Âişe Hatun’a iki bin sağ akçeye bey‘ ve teslîm ve temlîk ol dahi ber-vech-i muharrer iştirâ ve tesellüm ve temellük ve kabûl eylediğinden sonra semeni olan meblağ-ı mezbûr iki bin sağ akçeyi beynimizde ma‘lûm eşyâ-i mütenevviʻa bahâsından kendiye deynim olan iki bin akçeye takās eylediğimde ol dahi mukāssa ve kabûl eylediğinden sonra fîmâ-ba‘d oda-i mezkûrda olan tashîh-i mezkûr üzere dört sehm hisse-i şâyi‘am mezbûre diğer Âişe Hatun’un mülk-i müşterâsı olup keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: İbrahim Efendi b. Mehmed İmâm-ı mahalle-i Mi‘mâr Ayas, Mustafa Efendi b. el-merhûm Şeyh Hasan Efendi, Sandalî Ahmed Çelebi b. Mustafa, Hüseyin Efendi b. Ahmed, İvaz Çelebi b. Abdullah, Müezzin Mustafa Efendi b. Musa ve gayruhum mine’l-huzzâr.