Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 354 Hüküm no: 383 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Hasan’ın boşandığı kocası Seyyid Hasan Çelebi b. Hüseyin’deki mehir, nafaka ve diğer alacaklarını tahsil ettiği Mahmiye-i İstanbul’da Edirnekapısı kurbünde Arabzâde odalarında sâkine olup zâtı ta‘rîf-i şer‘î ile mu‘arrefe olan Ümmühani bt. Hasan nâm hatun meclis-i şer‘-i hatîr-i lâzımü’t-tevkīrde zevc-i sâbıkı işbu râfi‘u’l-kitâb es-Seyyid Hasan Çelebi b. Hüseyin nâm kimesne mahzarında ikrâr ve takrîr-i kelâm edip mezbûr Hasan zevcim olup târih-i kitâbdan on beş gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh olan beş yüz akçe mehr-i müeccelim ve bi’t-terâzî nafaka-i iddet ve meûnet-i süknâm için ta‘yîn olunan dört yüz akçe ve cihet-i deyn-i şer‘îden hakkım olan yedi yüz yirmi akçe ve beynimizde ma‘lûm bakır sini bahâsından dahi yüz yirmi akçe ki cem‘an bin yedi yüz kırk akçeyi zevc-i sâbıkım mezbûr es-Seyyid Hasan Çelebi yedinden tamamen ahz u kabz edip husûs-ı mezbûra ve hukūk-ı zevciyete ve sâir beynimizde cereyân eden hukūk-ı ma‘lûme ve mechûleye müte‘allika âmme-i de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Es-Seyyid Mehmed Çavuş el-Mübâşir, Mustafa Çelebi b. Şa‘ban, Ömer Çelebi b. Ahmed, Süleyman b. Abdullah, Ali b. İvaz ve gayruhum mine’l-huzzâr.