Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 358 Hüküm no: 388 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Mehmed’e talebiyle kendisini terk edip giden kocası Mehmed b. Ali’nin ödemesi şartıyla nafaka tayini Mahmiye-i İstanbul’da Lalezâr? Mahallesi’nde sâkine olup zâtı mahalle-i mezbûre sükkânından Mustafa Efendi b. Receb ve Hasan Beşe b. Osman nâm kimesneler ta‘rîfleriyle mu‘arrefe olan işbu râfi‘atü’l-kitâb Meryem bt. Mehmed nâm hatun mahfil-i kazâda takrîr-i kelâm ve tâʻbir ani’l-merâm edip zevc-i dâhilim Mehmed b. Ali nâm kimesne bundan akdem beni bilâ-nafaka terk edip âhar diyâra gitmekle ben nafakaya eşedd-i ihtiyâc ile muhtâce olmağla zevcim mezbûr Mehmed üzerine benim için kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi mezbûreyi ba‘de’t-tahlîfü’ş-şer‘î mezbûrenin nafaka ve kisve-bahâ ve sâir levâzım-ı zarûriyyesîçün zevci gāib-i mezbûr Mehmed üzerine târih-i kitâbdan beher yevm sekizer akçe nafaka ve kisve-bahâ farz ve takdîr edip meblağ-ı mefrûz-ı mezbûru kendi mesârifine harc u sarfa ve lede’l-iktizâ istidâneye ve inde’z-zafer mezbûr Mehmed üzerine rücû‘a mezbûre Meryem Hatun’a izin vermeğin mâ-vaka‘a bi’t-taleb ketb olundu. Fî 19 min-Cumâdelâhire sene 1121 Şuhûdü’l-hâl: Hasan Beşe b. Mehmed, Ömer Çelebi b. Ahmed, Mustafa Çelebi b. Şa‘ban, Ali b. İvaz, Ali b. Bâli, Hasan b. Abdullah, Çalık Mehmed ve gayruhum mine’l-huzzâr.