Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 359 Hüküm no: 389 Orijinal metin no: [53a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Yusuf ile oğlu Hacı Murtaza’nın vârisleri, murislerinin Çankırı Valisi Polad Mehmed Paşazâde İsmail Paşa ve babasında alacakları olduğu valinin de aynı şekilde kendisinin ve babasının alacağı olduğu iddiasıyla açtıkları davada tarafların sulh oldukları Vilâyet-i Anadolu’da Uzeyr sancağında Belen kasabası ahâlîsinden iken bundan akdem vefât eden Mehmed Ağa b. Yusuf’un verâseti zevcesi Şahnisa bt. Osman nâm hatun ile sulbî kebîr oğulları Fethullah Efendi ve el-Hâc Murtaza’ya münhasıra olup ba‘dehû mezkûr el-Hâc Murtaza dahi vefât edip verâseti vâlidesi mezbûre Şahnisa ile li-ebeveyn karındaşı mezbûr Fethullah Efendi’ye ve sagīre kızı Raziye’ye münhasıra olduğu mütehakkık oldukdan sonra mezbûr Fethullah Efendi kendi tarafından asâleten ve sagīre-i mezbûre Raziye’nin vasiyy-i mansûbesi mezbûre Şahnisa tarafından husûs-ı âti’l-beyâna vekîl olduğu İbrahim Ağa b. Ahmed ve el-Hâc Mustafa b. Ahmed şehâdetleriyle sâbit olmağla vekâleten mahfil-i kazâda hâlâ Kengiri vâlîsi olan Polad Mehmed Paşazâde İsmail Paşa hazretleri tarafından husûs-ı câi’z-zikre vekîl olduğu Mehmed b. Şa‘ban ve Yusuf b. Mehmed şehâdetleriyle sâbit olan Mehmed Emin Efendi b. İshak mahzarında ikrâr ve takrîr-i kelâm edip mezbûr İsmail Paşa’nın babası mezbûr Polad Mehmed Paşa hayâtında mûrisimiz müteveffâ-i mezbûr Mehmed Ağa’nın bundan akdem hediyesi beynimizde ma‘lûme bir en‘âm-ı şerîf ve iki bin beş yüz guruş ve benim dahi altı yüz guruşumu bi-gayr-ı hakkın ahz u kabz edip kable’l-edâ ikisi dahi vefât ettiğinden sonra mezbûr İsmail Paşa dahi mezbûr el-Hâc Murtaza’nın hayâtından dört yüz guruş ile seksen guruş kıymetli bir çadırını ve benim dahi elli guruş kıymetli bir mükemmel bisâtımla taht-ı revânımı ve karındaşın müteveffâ-i mezbûr el-Hâc Murtaza’da bin otuz guruşum var idi deyü Belen kazâsında mutasarrıf olduğum sülüs hisse-i Cebel-i Navlı mâlikânemi dahi iki sene fuzûlen zabt ve bin üç yüz guruş mikdârı mahsûlünü tegallüben ahz u kabz etmekle zikr olunan husûsları Polad Paşa’nın terekesine vâzı‘u’l-yed olan mezbûr İsmail Paşa’dan taleb ve da‘vâ eylediğimde ol dahi edâdan imtinâ‘ ettiğinden mâ‘adâ karındaşın mezbûr el-Hâc Murtaza zimmetinde beynimizde ma‘lûm çiftlik bahâsından ve eşyâsı bahâsından sekiz kîse akçem vardır deyü da‘vâ etmekle beynimizde nizâ‘-ı küllî vukū‘undan sonra muslihûn tavassut edip mezbûr İsmail Paşa vekîli mezbûr Mehmed Emin Efendi de‘âvâ-yı mezkûrelerinden benimle vekâleti hasebiyle üç yüz elli guruşa sulh oldukda [53b] ben dahi asâleten ve vekâleten sulh-ı mezbûru kabûl ve bedel-i sulh olan meblağ-ı mezbûr üç yüz elli guruşu bi’l-asâle ve bi’l-vekâle vekîl-i mezbûrdan bi’t-tamam ahz u kabz ettiğimden sonra zikr olunan husûslara müte‘allika âmme-i de‘âvî ve mutâlebâtdan ben bi’l-asâle ve bi’l-vekâle mezbûr İsmail Paşa’nın zimmetini ibrâ-i âmm-ı kātı‘u’n-nizâ‘la ibrâ ve iskāt edip ve vekîl-i mezbûr Mehmed Emin Efendi dahi bi’l-vekâle kezâlik husûs-ı mezbûra ve çiftlik ve sekiz kîse akçeye ve bin otuz guruşa müte‘allika cemî‘ de‘âvî ve muhâsamâtdan benim ve vâlidem mezbûre Şahnisa’nın ve sagīre-i mezbûre Raziye’nin zimmetlerini ibrâ ve iskāt edip kat‘-ı nizâ‘ eyledik min-ba‘d târih-i kitâba gelince paşa-yı mezbûrun benim ile ve benim dahi mezbûr ile da‘vâ ve nizâ‘ım kalmadı dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: İbrahim Çavuş Ağa, el-Hâc Mustafa Çavuş el-Mübâşir, İbrahim b. Mustafa, Ali b. Mehmed, Ali b. Mehmed, İbrahim Ağa Kethüdâ-yı başbâkī kulu, Mehmed b. Şa‘ban, Yusuf b. Mehmed, İbrahim Ağa b. Ahmed, el-Hâc Mustafa b. Ahmed, Osman Efendi Kîsedâr, Mustafa Ağa Hazînedâr sâbıkā, İbrahim Ağa Haleb muhassılı kapıkethüdâ[sı], es-Seyyid Hüseyin Ağa ve gayruhum mine’l-huzzâr.