Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 360 Hüküm no: 390 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey b. İsmail Paşa b. Ali Ağa’nın ortak olduğu arsadaki hissesini kardeşi ve ortağı Ayşe Hanım’a sattığı, daha önce kardeşine açtığı davalardan da vazgeçtiği Mahmiye-i İstanbul’da Molla Gürânî Mahallesi’nde sâkin fahrü’l-eşbâh Abdullah Bey b. el-merhûm İsmail Paşa b. Ali Ağa meclis-i şer‘-i şerîf-i enverde li-ebin hemşîresi olan umdetü’l-muhadderât işbu sâhibetü’l-kitâb Âişe Hanım tarafından zikri âtî husûsu tasdîka vekîl olduğu zât-ı mezbûreyi ma‘rifet-i şer‘iyye ile ârifân Murad Ağa b. Ya‘kub ve Halil Ağa b. Mehmed nâm kimesneler şehâdetleriyle şer‘an sâbit olan el-Hâc Osman Ağa b. Ali nâm kimesne mahzarında ikrâr ve takrîr-i kelâm edip hemşîresi müvekkile-i müşârun-ileyhâ ile ber-vech-i iştirâki’s-seviyy bi’l-icâreteyni’l-ma‘lûmeteyn taht-ı tasarrufumuzda olup mahmiye-i mezbûrede Hoşkadem Mahallesi’nde vâki‘ sarayları matbahı kurbünde Çadırcı Ahmed Vakfı’ndan olan arsa ve saray-ı mezkûr karşısında bahçe dâhilinde vâki‘ Medîne-i münevvere ve Hoşkadem vakıflarından olan arsa-yı hâliyelerde olan benim nısf hissemi bâ-ma‘rifet-i mütevellî iki yüz elli guruş bedel mukābelesinde hemşîrem müvekkile-i müşârun-ileyhâya ferağ ve tefvîz eylediğimde ol dahi tefevvüz ve kabûl edip bedel-i mezkûr iki yüz elli guruşu hemşîrem müvekkile-i müşârun-ileyhâ yedinden tamamen ahz u kabz edip hemşîrem müvekkile-i mûmâ-ileyhâdan bundan esbak sen eşyâ-i memlûkemden elli guruş kıymetli bir sim kemer raht ve yine elli guruş kıymetli bir sim haydarî raht ve üç yüz otuz guruş kıymetli beynimizde ma‘lûm bir re’s Gülbeyaz nâm câriyemi bi-gayr-ı hakkın ahz ve âhara bey‘ ile istihlâk etmişidin deyü semenlerini da‘vâ etmişidim hâlâ da‘vâ-yı mezkûremden meccânen fâriğ olup husûs-ı mezkûre ve beynimizde ma‘lûm Balıklı Çiftliği demekle ma‘rûf çiftlik ve çiftlik-i mezbûrun yedi senelik muhâsebesinden mâ‘adâ târih-i kitâba gelince beynimizde cereyân eden ahz u i‘tâ ve [ve mu‘âmelât-ı] şettâ [ve] kalîl ü kesîr ve celîl ü hakīr hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan hemşîrem müvekkile-i müşârun-ileyhânın zimmetini ibrâ-i âm ile ibrâ ve iskāt eyledim baʻde’l-yevm çiftlik-i mezkûr ve muhâsebesinden mâ‘adâ aslâ ve kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: Mustafa Ağa b. Mehmed, Hüseyin Ağa b. Ali, el-Hâc Ali Ağa b. Mehmed, İmâm Ali Efendi b. Ahmed, Abdullah Çelebi b. Ali Efendi, Ahmed Çelebi b. Ali Efendi, Müezzin Abdullah Efendi b. Mehmed, Mustafa Çelebi b. Şa‘ban, Mehmed Çelebi b. Abdi ve gayruhum mine’l-huzzâr.