Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 365 Hüküm no: 396 Orijinal metin no: [54a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Alil b. Hamza ile Hacı Ahmed b. Abdullah’ın evleri arsalarının bir kısmına haksız yere bina inşa eden Hasan Beşe b. Osman ile Fâtıma Hatun’un tecavüz ettikleri kısmın tasarrufundan menedildikleri Husûs-ı âti’z-zikrin mahallinde keşf ü tahrîr ve fasl u hasmıʼçün fermân-ı âlî sâdır olmağın savb-ı şer‘-i mergūbdan Mevlânâ Mehmed Efendi b. Yusuf ta‘yîn ve irsâl olunup ol dahi hâssa mi‘mârlarından Şa‘ban Halîfe b. Ali ile mahmiye-i İstanbul’da Kâtib Şemseddin Mahallesi’nde sâkin el-Hâc Halil b. Hamza nâm kimesnenin menziline varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i kavîm eyledikde işbu bâ‘isiye’l-kitâb mezbûr el-Hâc Halil ve merhûm Musa Çavuş Vakfı’ndan bir bâb menzile mutasarrıf olan el-Hâc Ahmed b. Abdullah nâm kimesneler meclis-i ma‘kūd-ı mezkûrda merhûme Saraylı Mahpeyker Vakfı’ndan iki bâb menzillere mutasarrıfân olan Hasan Beşe b. Osman ve Fâtıma bt. ( ) nâm hatun mahzarlarında vakfeyn-i mezbûreyn mütevellîleri Hasan Efendi b. Ramazan ve İbrahim Ağa b. el-Hâc Ali [54b] nâm kimesneler hâzırân oldukları hâlde her biri üzerlerine da‘vâ ve takrîr-i kelâm edip merhûme Mahpeyker Vakfı’ndan olup mezbûrân Hasan Beşe ve Fâtıma Hatun tasarruflarında olan mârru’z--zikr iki bâb menziller mukaddemâ mezbûr Hasan Beşe’nin tasarrufunda iken bundan akdem vâki‘ olan harîkde muhterik olmağla târih-i kitâbdan on sene mukaddem mezbûr Hasan Beşe menzileyn-i mezkûreyni müceddeden binâ ettikde vaz‘-ı kadîmine mugāyir bizim menzillerimize muttasıl binâ ve mi‘mâr-ı mezbûr mesâhası üzere tûlen yirmi dört ve arzen bir zirâ‘ ve altı parmak işbu bizim menzillerimizin kadîmî damlalıkları arsasını gasb ve üzerine fuzûlen binâ ihdâs edip ve üç sene mukaddem mezbûr Hasan Beşe menzileyn-i mezkûreynden bir bâb menzilini mezbûre Fâtıma Hatun’a ma‘rifet-i mütevellî ile fâriğ olmağla ol dahi tûlen yedi zirâ‘ ve arzen bir zirâ‘ ve altı parmak kadîmî damlalığımız arsasını gasb ve üzerine fuzûlen hâlâ binâ ihdâs etmişdir suâl olunup kasr-ı yedlerine tenbîh olunmak murâdımızdır dediklerinde gıbbe’s-suâl mezbûrân Hasan Beşe ve Fâtıma Hatun cevâblarında arsa-yı mezkûre üzerine ber-vech-i muharrer binâ ihdâs eylediklerini ikrâr lâkin zikr olunan arsa müdde‘iyân-ı mezbûrân el-Hâc Halil ve el-Hâc Ahmed’in menzillerinin kadîmî damlalığı arsası olduğunu inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i ricâlden mahalle-i mezbûre sükkânından İmâm Mehmed Efendi b. Mahmud ve diğer Mehmed Efendi b. Ramazan ve Mehmed Ağa b. Habib Ağa ve Osman Ağa b. Yusuf ve Ali Efendi b. Mehmed ve Hacı Ahmed b. Mehmed ve Hasan Beşe b. Ali ve İsmail Çelebi b. Abdullah ve Salih Çelebi b. İbrahim ve Hüseyin Ağa b. Abdullah nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-vâki‘ müdde‘iyân-ı mezbûrân el-Hâc Ahmed b. Abdullah ve el-Hâc Halil b. Hamza’nın menzilleri kurbünde olan işbu menzileyn-i mezkûreyn merkūm Hasan Beşe’nin mukaddemâ tasarrufunda iken bundan akdem vâki‘ olan harîkde muhterik olmağla târih-i kitâbdan on sene mukaddem mezbûr Hasan Beşe menzileyn-i mezkûreyni müceddeden binâ eyledikde vaz‘-ı kadîmine mugāyir müdde‘iyân-ı mezbûrânın menzillerine muttasıl binâ etmekle mezbûr Hacı Ahmed’in tûlen on altı ve arzen bir zirâ‘ ve altı parmak arsasını gasb ve üzerine fuzûlen binâ ihdâs edip ve mezbûr Hacı Halil’in dahi tûlen sekiz zirâ‘ ve arzen bir zirâ‘ ve altı parmak arsasını fuzûlen gasb ve üzerine binâ ihdâs eyledikden sonra mezbûr Hasan Beşe menzileyn-i mezkûreynden bir bâb menzilini üç sene mukaddem mezbûre Fâtıma Hatun’a ma‘rifet-i mütevellî ile fâriğ olmağla mezbûre Fâtıma Hatun dahi müdde‘î-i mezbûr Hacı Halil’in tûlen yedi ve arzen tûlen bir zirâ‘ ve altı parmak arsası üzerine hâlâ fuzûlen binâ ihdâs etmişdir ve zikri mürûr eden min-haysü’l-mecmû‘ tûlen otuz bir zirâ‘ ve arzen bir zirâ‘ ve altı parmak arsa müdde‘iyân-ı mezbûrânın menzillerinin kadîmî damlalığı arsasıdır biz bu husûsa ber-minvâl-i muharrer üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın mûcebince müdde‘iyân-ı mezbûrân Hacı Ahmed ve Hacı Halil’in zikr olunan damlalıkları arsasından mezbûrân Hasan Beşe ve Fâtıma’nın kasr-ı yedlerine tenbîh eylediğini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Mehmed b. Abdurrahim ve Muhzır Osman b. Mustafa ile meclis-i şer‘a gelip her biri alâ-vukū‘ihî inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: İsmail Çelebi b. Abdullah, Mehmed Çelebi b. Habib, Hacı Ahmed Çelebi b. Mehmed, Osman Çelebi b. Yusuf, Ali Efendi b. Mehmed, Hasan Beşe b. Ali, Hüseyin b. Abdullah, Hacı Mehmed b. Hüseyin, Mustafa b. Abdullah, Molla Osman b. Abdullah, Mehmed Çelebi b. Yusuf, Musa Çelebi b. Abdullah, Ali Çelebi b. İvaz, Ahmed Beşe b. Abdullah ve gayruhum mine’l-huzzâr.