Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 292 Hüküm no: 715 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Dündar’ın kızı Tenzile’ye inek hibe ettiği Sebeb-i tahrîr-i sicil budur ki Tenzile bt. Dündar’ın vekîl[i] olan zevci Ahmed b. Mahmud ba‘de’s-sübûti’l-vekâlet şer‘an bi şehâdet-i Hüseyin b. Abdullah ve Durmuş [b.] Dündar’dan sâdır oldukdan sonra Sâfiye bt. ( ) ile şer‘-i şerîf meclisine hâzırân olup mezkûr Ahmed mezbûre Sâfiye üzerine takrîr-i merâm kılıp dedi ki bundan akdem hâtunum Tenzile’nin babası Dündar bir sakar kara sığır ineği hibe edip fevt oldukda sâir verese mukır ve mu‘terif olup sen dahi mukır olup vermiştin hâliyâ inâd edip vermezsin hayftır deyicek mezkûre Sâfiye’den istifsâr olundukda bi’l-mukābele inkâr eyledi gıbbe’l-[i]nkâr müdde‘î-i mezbûr Ahmed’in da‘vâsına muvâfık beyyine taleb olundu udûl-i müslimînden Hüseyin b. Abdullah ve Durmuş b. Dündar şehâdetü’ş-şer‘iyye kılıp dediler ki biz şâhidleriz şehâdet dahi ederiz ki mezkûr mevsûf ineği merhûm Dündar kızı Tenzile’ye hibe edip fevt oldukdan sonra sen dahi mezbûre Tenzile’nin deyû ikrâr eylemiştin deyû şehâdet eylediklerinden sonra şehâdetleri ba‘de’t-tezkiyye hayyiz-i kabûlde vâkī‘ olup mezbûr mevsûf inek mezbûr Ahmed’in zevcesi Tenzile bt. Dündar’a hükm edip sicil olundu. Tahrîren fî evâili Rebi‘ilevvel li sene isnâ ve erba‘în ve tis‘a mi’e. Şuhûdü’l-hâl: Ali b. Musa, Hızır b. Ahmed, Mustafa b. Mehmed ve Mevlânâ Ramazan b. Ahmed ve kâtibü’l-hurûf.