Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 369 Hüküm no: 398 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Mahmud b. Ahmed’in terekesinden olan evi vârislerinin Çukadâr Ahmed Beşe b. Musa’ya sattıkları Mahmiye-i İstanbul’da Beyceğiz Mahallesi sâkinelerinden iken bundan akdem vefât eden Râbia bt. Mahmud b. Ahmed’in verâseti vâlidesi Zeyneb bt. Abdullah ile kız karındaşı Hadice’ye ve li-ümmin karındaşları Süleyman ve Havvâ nâm sagīrlere münhasıra ve tashîh-i mes’eleleri altı sehmden olup sihâm-ı mezkûreden bir sehmi vâlidesi mezkûre Zeyneb’e ve üç sehmi mezkûre Hatice’ye ve bir sehmi mezkûrân Süleyman ve Havvâ’dan her birine isâbet ve intikāl eylediği şer‘an zâhir ve mütebeyyin oldukdan sonra zâtlarını ma‘rifet-i şer‘iyye ile ârifân Hasan Efendi b. Süleyman ve Mustafa Çelebi b. Mehmed ta‘rîfleriyle mu‘arrefân olan mezkûretân Zeyneb ve Hadice ile sagīrân-ı mezkûrânın babaları ve velîleri Mehmed Çelebi b. Süleyman nâm kimesne meclis-i şer‘-i şerîf-i enverde işbu râfi‘u’l-kitâb Çukadâr Ahmed Beşe b. Musa muvâcehesinde her biri ikrâr ve takrîr-i kelâm edip mûrisemiz müteveffât-ı mezkûre Râbia’nın terekesinden olup mahalle-i mezkûrede vâki‘ bir tarafdan Mûytâb Mehmed Çelebi mülkü ve bir tarafdan Cebeci Mustafa Beşe menzili ve bir tarafdan Dellâk Mehmed Çelebi mülkü ile mahdûd fevkānî iki oda ve tahtânî iki oda ve kenîf ve tahta-pûş ve su kuyusu ve bir mikdâr havluyu müştemil olup tashîh-i mezkûr üzere cümlemize isâbet eden mülk menzili bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezkûr Ahmed Beşe’ye üç yüz guruş ile adedi nâ-ma‘lûm bir kabza fülûs-ı muzî‘aya bey‘ ve temlîk ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan üç yüz guruşu mezkûr Ahmed Beşe yedinden bi’t-tamam ve’l-kemâl ahz u kabz ve alâ-kadri’l-hısas beynimizde iktisâm eyledik baʻde’l-yevm menzil-i mahdûd-ı mezkûr merkūm-ı mezkûr Ahmed Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’l-mer‘î mesfûrân Mehmed Çelebi ve Zeyneb’den her biri i‘âde-i kelâm edip evlâdımız sagīrân-ı mezkûrân kebîr olup bey‘-i mezkûru tecvîz etmeyip mezkûr Ahmed Beşe’den bir nesne ahz ederler ise me’hûzlarına biz dâmin ve kefîl olduk dediklerinde mâ-hüve’l-vâki‘ bi’t-taleb ketb olundu. Fî 24 min-Cumâdelâhire sene 1121 Şuhûdü’l-hâl: İbrahim Efendi b. el-Hâc Ali el-Kādı, Hüseyin Çelebi Muhzır, Mehmed Çelebi b. Mustafa, Mehmed Çelebi b. Murad, el-Hâc Mustafa b. Bekir, Mustafa Çelebi b. Mehmed, Hasan Efendi b. Süleyman, Münâdî Mehmed Çelebi b. Mustafa, Süleyman Efendi b. Ahmed, Ali Beşe b. Mahmud ve gayruhum mine’l-huzzâr.