Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 370 Hüküm no: 399 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ahmed’in Şumnu’daki menzilini İbrahim b. İvaz’a sattığı Vilâyet-i Rumeli’nde medîne-i Şumnu mahallâtından Eski Câmi‘ Mahallesi ahâlîsinden olup mahmiye-i İstanbul’da Karabaş Mahallesi’nde sâkine zâtı ta‘rîf-i şer‘î ile mu‘arrefe olan Hadice bt. Ahmed nâm hatun mahfil-i kazâda işbu râfi‘u’l-kitâb İbrahim b. İvaz nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mârru’z--zikr Eski Câmi‘ Mahallesi’nde vâki‘ bir tarafdan es-Seyyid Hasan Çelebi menzili ve bir tarafdan Mustafa nâm kimesne menzili ve bir tarafdan Mehmed Beşe ve bir tarafdan tarîk-i âm ile mahdûd ma‘lûmü’l-müştemilât menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î [ile] mezbûr İbrahim’e otuz yedi guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden semeni olan meblağ-ı mezbûr otuz yedi guruşu mezbûr İbrahim yedinden tamamen ahz u kabz eyledim baʻde’l-yevm menzil-i mahdûd-ı mezkûru cemî‘ müştemilâtıyla mezbûr İbrahim’in mülk-i müşterâsı ve hakk-ı sırfı olup mahallinde zabta mezbûr İbrahim’i taslît eyledim keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-Cumâdelâhir[e] li-sene 1121 Şuhûdü’l-hâl: el-Hâc Selim b. Abdullah, Ali b. Mustafa, Hasan Çelebi b. Mustafa, Abdullah Çelebi b. Mustafa, Mustafa Çelebi b. Şa‘ban, Ali Çelebi b. Bâli.