Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 298 Hüküm no: 728 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta b. Bostancı’nın yaptığı evin Manol b. Andriye’nin evine havalesi olduğu Sebeb-i tahrîr-i sicil budur ki İstavros nâm karyeden Manol b. Andriye bundan akdem Kosta b. Bostancı ile meclis-i şer‘a gelip üzerine takrîr-i da‘vâ kılıp evim civârında mezkûra bir evim bey‘ eylemiştim hâliyâ bozup tekrâr yaptıkda benim evimin üzerine havâle eyledi deyicek üzerine varılıp görüldükde vâkı‘â havâle olduğu zâhir olmağın mezkûr Kosta’ya havâlesi ref‘ olunmasına hükm olundukda mezkûr Kosta ben mezkûr Manol’den zikr olan evini aldığım vakt bi’l-fi‘l mezkûr Manol’ün sâkin olduğu evin duvarının nısfın bile bâz edip aldım şâhidlerim vardır deyicek üç güne mühlet-i şer‘î verilip üç gün tamâm olup ikāmet-i beyyineden âciz oldukdan sonra mezkûr Kosta’nın binâ eylediği evinin havâlesin ref‘ olunmasın hükm olunup sicil olundu. Tahrîren fî evâili Rebi‘ilevvel sene 942. Şuhûdü’l-hâl: Mustafa b. Mehmed, Bâli b. Aslıhan ve Hızır b. Ahmed ve Mevlânâ Ramazan b. Ahmed ve gayruhüm.