Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 298 Hüküm no: 729 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emir b. Çepni’nin Kara Lütfi’den alacağını vekili Mürüvvet’ten istemesi Sebeb-i tahrîr-i sicil budur ki Emir b. Çepni meclis-i şer‘a gelip bilesine Domuzlu nâm karyeden Mürüvvet Reis b. İsâ Hacı ihzâr edip üzerine takrîr-i da‘vâ kılıp dedi ki bundan sâbık karye-i mezkûrdan Kara Lütfi nâm kimesneye karz-ı hasen bin akçe vermiştim mezkûr Kara Lütfi fevt olup meblağ-ı mezbûr zimmetinde kaldı. Öyle olsa mezkûr Mürüvvet Reis[’i] yerime vekîl nasb edip gönderdim varıp mezkûrun oğlu babasının deyni için mezkûr Mürüvvet Reis’e iki siyah camus öküzünü verip mezkûr Mürüvvet Reis dahi Hasan nâm kimesneye öküzleri satmış hâliyâ taleb ederim deyicek mezkûr Mürüvvet’ten istifsâr olundukda bi’l-mukābele cevâb verip dedi ki mezkûr Çepni beni vekîl eyledi ben dahi vardım mezkûr Kara Lütfi’nin oğlu Ali Çelebi mezbûr Çepni’ye olan bin akçe deyni için bana iki camus siyah öküzler verip teslîm eyledi, ben dahi Hasan nâm kimesneye bey‘ eyledim deyicek ikrârı Çepni talebiyle sicil olundu. Şuhûdü’l-hâl: İvaz b. Şâzî, Şeyh Paşa b. Hasan, Mustafa b. Mehmed, Hızır b. Ahmed ve kâtibü’l-hurûf.