Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 370 Hüküm no: 400 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in çocuğunun düşmesine sebep olan cariye Gülbeyaz bt. Abdullah ile sahibi Abdullah Çelebi b. Mustafa’ya açtığı davada sulh oldukları Mahmiye-i İstanbul’da el-Hâc Muhyiddin Mahallesi’nde sâkine zâtı Ali Çelebi b. Halil ve Ahmed Çelebi [b.] Osman nâm kimesneler ta‘rîfleriyle mu‘arrefe olan Hadice bt. Mehmed nâm hatun mahfil-i kazâda işbu râfi‘atü’l-kitâb Gülbeyaz bt. Abdullah nâm câriyenin mevlâsı Abdullah Çelebi b. Mustafa nâm kimesne mahzarında ikrâr ve <> takrîr-i kelâm edip mezbûre Gülbeyaz târih-i kitâbdan on beş gün mukaddem kendi menzilimde beni elimden çekip ben dahi nerdübâna düşmekle müstebînü’l-hilka iki cenîn vaz‘ eylemişidim deyü mezbûre Gülbeyaz’dan mûceb-i şer‘îsini da‘vâ eylediğimde ol dahi inkâr etmekle beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî mevlâsı mezbûr Abdullah Çelebi ile da‘vâ-yı mezbûremden beni yedi guruş üzerine sulh eylediklerinden ben dahi sulh-ı mezbûru kabûl ve bedel-i sulh olan mebgal-i [meblağ-ı] mezbûr yedi guruşu mezbûr Abdullah Çelebi yedinden tamamen ahz u kabz edip husûs-ı mezkûra müte‘allika âmme-i de‘âvî ve mutâlebât ve eymân-ı muhâsamâtdan mezbûre Gülbeya[z] ve mevlâsı merkūm Abdullah Çelebi’nin zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm husûs-ı mezkûra vechen mine’l-vücûh ve sebeben mine’l-esbâb aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Cumâdelâhire li-sene 1121 Şuhûdü’l-hâl: Es-Seyyid Halil Çavuş b. es-Seyyid Mehmed, Mustafa Çelebi b. Şa‘ban, Ahmed Beşe b. Mehmed, Ali b. Hâcı? Bâli, Hasan Çelebi b. Mustafa.