Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 371 Hüküm no: 401 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hanım’ın Hacı Osman Vakfı’ndan kiracısı olduğu iki dükkan ve bir odanın yarı hissesine sahibi vefât eden kardeşi Ayşe’nin hissesini de kiraladığı Mahmiye-i İstanbul’da Gül Câmi‘-i şerîfi Mahallesi’nde vâki‘ ashâb-ı hayrâtdan merhûm el-Hâc Osman nâm sâhibü’l-hayrın evlâdiyet ve meşrûtiyet üzere mütevelliyesi olan Rahime bt. el-Hâc ( ) tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Ömer Efendi b. Hızır ve Mehmed Çelebi b. Salih nâm kimesneler şehâdetleriyle şer‘an sâbit olan Süleyman Efendi b. Abdullah mahfil-i kazâda işbu râfi‘atü’l-kitâb Ümmühani bt. Hasan Odabaşı nâm hatun mahzarında bi’l-vekâle ikrâr ve takrîr-i kelâm edip vakf-ı mezbûr musakkafâtından olup mârru’z--zikr Gül Câmi‘-i şerîfi Mahallesi’nde vâki‘ lede’l-ahâlî ve’l-cîrân ma‘lûmü’l-hudûd iki bâb dükkân ve bir bâb odanın nısfı icâreteyn-i ma‘lûmeteyn ile mezbûre Ümmühani’nin tasarrufunda ve nısf-ı âhiri li-ebeveyn kız karındaşı olup bilâ-veled fevt olan Âişe’nin tasarrufunda olup hissesi vakf-ı şerîfe intikāl etmekle hisse-i mezkûre taraf-ı vakfdan sûk-ı sultânîde baʻde’l-müzâyede ve inkıtâ‘ı’r-ragabe yine mezbûre Ümmühani üzerinde kırk guruşda karâr edip ziyâde ile tâlib-i âhar dahi zuhûr etmemekle hisse-i mezkûre taraf-ı vakf-ı şerîfden meblağ-ı mezbûr kırk guruş mu‘accele ile ve ücret-i müeccele-i ma‘lûmesiyle mezbûre Ümmühani’ye îcâr ve teslîm eylediğinde ol dahi ber-vech-i muharrer istîcâr ve tesellüm ve kabûl eylediğinden sonra mu‘accelesi olan meblağ-ı mezbûr kırk guruşu bi’t-tevliye taraf-ı vakf için mezbûre Ümmühani yedinden tamamen ahz u kabz eyledi baʻde’l-yevm mârru’z--zikr dükkânların ve odanın mecmû‘u mezbûre Ümmühani’nin dâhil-i havza-i tasarrufu olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Cumâdelâhire sene 1121 Şuhûdü’l-hâl: Ömer Efendi b. Hızır, Mehmed Çelebi b. Salih Kâtib-i vakf, Ali Bey b. Abdullah el-Mübâşir, Salih Efendi b. Yahya el-İmâm, Ali b. İvaz ve gayruhum mine’l-huzzâr.