Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 372 Hüküm no: 402 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Tuncu’nun kendisini yaralayan Kiryako v. Anderya ile sulh oldukları Mahmiye-i İstanbul’da Küçükpazar kurbünde sâkin Dimo v. Tuncu nâm zimmî meclis-i şer‘-i şerîf-i enverde işbu râfi‘u’l-vesîka Kiryako v. Anderya nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip mezkûr Kiryako üç gün mukaddem Lidros nâm karyede Kiriste nâm zimmînin dükkânı önünde vakt-i dahve-i kübrâda beni sol tarafımdan küreğimin tahtından beyaz saplı bıçak ile kasden amden bi-gayr-ı hakkın darb ve cerh etmekle mezkûr Kiryako’dan mûceb-i şer‘îsini taleb ve da‘vâ eylediğimde ol dahi inkâr etmeğin beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezkûr Kiryako ile yirmi guruş üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr yirmi guruşu mezkûr Kiryako yedinden tamamen ahz u kabz eyledim baʻde’l-yevm cerh-i mezkûre ve mâ-tehaddese minhe müte‘allika ve eğer cerh-i mezkûrdan müteessiren hâlik olur isem dem ve diyetime müte‘allika da‘vâdan mezkûr Kiryako’nun zimmetini ibrâ-i âmm-ı râfi‘u’l-hısâm ile ibrâ ve iskāt eyledim fîmâ-ba‘d husûs-ı mezkûra müte‘allika vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 24 min-Cumâdelâhire sene 1121 Şuhûdü’l-hâl: Mustafa Çelebi b. Ali, İsmail b. İsmail, Ali Çelebi b. Abdullah, Yusuf Çelebi b. Ali, Hasan b. Davud, el-Hâc Mehmed b. Ahmed, Abdurrahman b. Hüseyin, İsmail Çelebi b. Mustafa, İsmail Çelebi b. Mustafa, İsmail Çelebi b. İbrahim ve gayruhum mine’l-huzzâr.