Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 372 Hüküm no: 403 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sükyas v. Mikail’in çeşitli ev eşyalarını oğulları Sahak ve Avadik’e satıp zimmetlerini ibra ettiği Mahmiye-i İstanbul’da Kefeli Mahallesi’nde sâkin Sükyas v. Mikail nâm zimmî mahfil-i kazâda sulbî kebîr oğulları işbu râfiʻayü’s-sifr Sahak ve Avadik nâm zimmîler mahzarlarında ikrâr ve takrîr-i kelâm edip eşyâ-i memlûkemden yedi kadife yasdık ve dört kebîr yorgan ve on beş sagīr? minderi ve otuz yemenî yasdık ve on beş sagīr minder ve iki hatâyî Mısır hasırı ve def‘a iki Mısır hasırı ve altı yemenî mak‘ad ve iki çuka ocak yaşmağı ve altı mücelled evrâk-ı İncil ve bir kebîr ceviz sandığı ve üç kilim ve iki tiftik kebe ve iki âyine ve iki kebîr döşek ve seksen vakıyye bakırımı tarafeynden îcâb ve kabûlü hâvî bey‘-i bâtt-ı kat‘î ile oğullarım mezbûrâna bi-safkatin vâhidetin iki yüz guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr iki yüz guruş mutâlebesinden oğullarım mezbûrânın zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm eşyâ-i muharrere-i mezkûre oğullarım mezbûrânın mülk-i müşterâları olmuşdur keyfe mâ yeşâ’ân ve yehtârân mutasarrıflar olsunlar dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-Cumâdelâhire sene 1121 Şuhûdü’l-hâl: Ahmed Efendi b. Hüseyin el-İmâm, Müezzin Mahmud Efendi b. Mustafa, Abdülbâki Çelebi b. Ali, Mustafa Çelebi b. Şa‘ban, Ömer Çelebi b. Ahmed ve gayruhum mine’l-huzzâr. Begos v. Ellez, Sergis v. Agop, Sahak v. Arzuman, Aritun v. Begos, Bali v. Nikagos, Sergis v. Begos, Abraham v. Savader, Bağdasar v. Kirkor, Karabet v. Piyer, Arakil v. Avakos, Papa Mesruk v. David, Papa Kirkor v. Mesruk, İsayi v. Avanos, Meldon v. Menyas, Avadik v. Sahak, Abraham v. ( ).