Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 373 Hüküm no: 404 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Seyyid Hacı Ebûbekir b. Hacı Ali’nin astar bedelinden alacaklısı olduğu Kirkor v. Marko’ya borcunu ödemesinin tenbihi Tüccâr tâifesinden işbu bâ‘isü’l-kitâb es-Seyyid el-Hâc Ebûbekir b. el-Hâc Ali nâm kimesne mahfil-i kazâda Kirkor v. Marko nâm zimmî muvâcehesinde üzerine da‘vâ ve takrîr-i kelâm edip merkūm Kirkor zimmetinde yedimden iştirâ ve kabz eylediği beynimizde ma‘lûm astar bahâsından yüz otuz yedi guruş hakkım olmağla suâl olunup alıverilmesi matlûbumdur dedikde gıbbe’s-suâl merkūm Kirkor cevâbında fi’l-hakīka kaziyye minvâl-i meşrûh üzere olup müdde‘î-i mezbûra zikr olunan astar bahâsından yüz otuz yedi guruş el-ân zimmetinde lâzımü’l-kazâ deyni olduğunu ikrâr u i‘tirâf etmeğin alâ-mûcebi i‘tirâfihî meblağ-ı mezbûr yüz otuz yedi guruşu müdde‘î-i mezbûra edâ ve teslîme merkūm Kirkor’a tenbîh olunmağın mâ-vaka‘a bi’t-taleb ketb olundu. Fî-muntasıfı Cumâdelâhire sene 1121 Şuhûdü’l-hâl: Es-Seyyid Ali Çelebi b. Hasan, es-Seyyid Mehmed b. Ali, Hasan Bey b. ( ), el-Hâc Mustafa Efendi b. ( ) ve gayruhum mine’l-huzzâr.