Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 374 Hüküm no: 405 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Veli’nin yağlık ve gömlek bedelinden Abdullah b. Abdurrahman’a olan borcunu taksitler halinde ödeyeceği Mahmiye-i İstanbul’da Karabaş Mahallesi’nde sâkine Fâtıma bt. Veli nâm hatun mahfil-i kazâda yağlıkcı tâifesinden işbu bâ‘isü’l-kitâb Abdullah b. Abdurrahman nâm kimesne mahzarında ikrâr ve takrîr-i kelâm edip mezbûr Abdullah yedinden iştirâ ve kabz eylediğim adedi beynimizde ma‘lûm yağlık ve gömlek bahâlarından yirmi beş guruş deynim olup meblağ-ı mezbûru hâlen ve def‘aten edâya iktidârım olmayıp te’cîl ve taksîte tâlib olduğumda ol dahi meblağ-ı mezbûru târih-i kitâbdan her otuz gün tamamında ikişer guruş verip cem‘an üç yüz yetmiş beş gün tamamına değin meblağ-ı mezbûrun mecmû‘unu tamamen edâ ve teslîm etmek üzere beni te’cîl ve taksît eylediğinde ben dahi kabûl ve meblağ-ı mezkûru ber-vech-i muharrer müdde‘î-i mezbûr Abdullah’a edâya ta‘ahhüd eyledim dedikde gıbbe’t-tasdîkı’ş-şer‘î mahmiye-i mezbûrede Çukurbostan Mahallesi’nde sâkin es-Seyyid İbrahim b. Ahmed ve es-Seyyid Mehmed b. es-Seyyid Osman nâm kimesneler mahfil-i kazâda merkūm Abdullah mahzarında her biri ikrâr ve takrîr-i kelâm edip medyûne-i mezbûre Fâtıma’nın nefsine ve hîn-i mutâlebede meclis-i şer‘a ihzârına her birimiz kefîl olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: Mustafa Çelebi b. Şa‘ban, el-Hâc Hasan Çukadâr, Ali b. İvaz, Ali b. Abdullah, Süleyman b. Abdullah ve gayruhum mine’l-huzzâr.