Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 378 Hüküm no: 412 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fayro bt. Yorgi’nin eşyalarını çalınmasına sebep olan Yorgi v. Dimo’dan yirmi guruş alarak sulh olduğu Mahmiye-i İstanbul’da Kumkapı kurbünde sâkine Fayro bt. Yorgi nâm Nasrâniye ba‘de’t-ta‘rîf mahfil-i kazâda işbu râfi‘atü’s-sifr Panoye bt. Corko nâm Nasrâniye mahzarında ikrâr ve takrîr-i kelâm edip bundan akdem mecmû‘u yirmi dokuz guruş kıymetli bir dîbâ kaftan ve bir anteri ve bir çekmece makrame ve iki peşgûnu ve bir telli gömleğimi ve bir ferâce mezbûre Pano’nun menzilinde bırakıp ba‘dehû işbu Dimitri’ye şâkirdin işbu hâzır bi’l-meclis Yorgi v. Dimo’yu irsâl edip eşyâ-i mezkûreyi getirsin deyü emir ettiğimde mezbûr Dimitri dahi işbu merkūm Yorgi’yi emrim ile irsâl ol dahi varıp eşyâ-i mezkûreyi baʻde’l-kabz bakkal dükkânı yanına vaz‘ ve âhar işe meşgūl iken sirka olunmuş demekle beynimizde nizâ‘-ı küllî vukū‘undan sonra merkūm Yorgi eşyâ-i mezkûre da‘vâsından benimle yirmi guruşa sulh oldukda ben dahi sulh-ı mezbûru kabûl ve bedel-i sulh olan meblağ-ı merkūm yirmi guruşu merkūm Yorgi’den ahz u kabz edip husûs-ı mezkûra müte‘allika da‘vâdan merkūm Yorgi’nin zimmetini ibrâ ve iskāt eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî evâhiri Cumâdelâhire sene 1121 Şuhûdü’l-hâl: el-Hâc Mehmed Çavuş el-Mübâşir, Ahmed Ağa b. İbrahim, el-Hâc Mustafa Efendi ve gayruhum mine’l-huzzâr. Todori v. Dimo, İskoli v. Yanaki.