Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 379 Hüküm no: 413 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Metro’nun bakkal dükkanını içindeki fırın ve aletleriyle birlikte Petro v. Dimo’ya vefaen sattığı Havâss-ı Refî‘a kazâsı nevâhîsinden Silivri nâhiyesine tâbi‘ Fener nâm karye ahâlîsinden Todori v. Metro v. ( ) nâm zimmî mahfil-i kazâda işbu râfi‘u’s-sifr Petro v. Dimo nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât altı kepenk bakkal dükkânı ve içinde mevcûd bir ekmekçi fırını ve tekne ve sâir âlât-ı lâzıme-i ma‘lûmemi târih-i kitâbdan altı ay tamamına değin bey‘ bi’l-vefâ tarîkı üzere mezbûr Petro’ya otuz sekiz bin yedi yüz doksan akçeye bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr otuz sekiz bin yedi yüz doksan akçeyi merkūmun kanâdârı olmam ile ve vakıyyesi beynimizde ma‘lûm lahm-ı ganem bahâsından zimmetimde deynim olan otuz sekiz bin yedi yüz doksan akçeye takās eylediğinde ben dahi mukāssa ve kabûl eyledim dedikde gıbbe’t-tasdîkı’ş-şer‘î mezbûr Todori meclis-i mezkûrda Mehmed Çelebi b. İbrahim nâm kimesne mahzarında ikrâr ve takrîr-i kelâm edip müddet-i mezkûre tamamında meblağ-ı mezbûru dâyinim mezbûr Petro’ya edâ ve menzil-i mezkûru fek müyesser olmaz ise mârru’z--zikr dükkân ve fırın ve tekne ve sâir âlât-ı lâzımemi semen-i misli ile âhara bey‘ ve kabz-ı semen ve semeninden deyn-i mezkûru edâ ve fazla kalır ise bana îsâle akd-i rehnde meşrûta küllemâ azeltüke fe-ente vekîlî mazmûnu üzere azl ve in‘izâlden masûne vekâlet-i devriye ile tarafımdan mezbûr Mehmed Çelebi’yi vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî-gurreti Recebi’l-ferd sene 1121 Şuhûdü’l-hâl: el-Hâc Osman b. Yusuf, Mustafa Çelebi b. Mehmed, Hüseyin Çelebi b. Abbas, Abdurrahman Çelebi b. Hüseyin, Fazlı Çelebi b. Hasan, Mustafa Çelebi b. Şa‘ban, Hüseyin Çelebi b. Süleyman, Abdullah Çelebi b. Mustafa, Ali Çelebi b. İvaz, Hasan b. Abdullah ve gayruhum mine’l-huzzâr.