Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 379 Hüküm no: 414 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Zolik’in evini Darbhâne-i âmire emini Ali Efendi b. Mehmed’e sattığı Mahmiye-i İstanbul’da Balatkapısı dâhilinde vâki‘ Tahta Minâre Mahallesi sâkinelerinden olup Maryem bt. Zolik nâm Nasrâniye tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Agop v. Sefer ve Asvader v. Serkis nâm zimmîler şehâdetleriyle şer‘an sâbit olan zevci Kabril v. Kokaz nâm zimmî meclis-i şer‘-i şerîf-i enverde hâlâ Darbhâne-i âmire emîni olan umdetü’l-emâcid ve’l-ekârim işbu sâhibü’l-kitâb Ali Efendi b. Mehmed tarafından vekîl-i müseccelleri olan Ahmed Ağa b. Mehmed mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkilem zevcem mezbûre Maryem’in yedinde mülkü olup mahalle-i mezbûrede vâki‘ bir tarafdan el-Hâc Abdullah Odabaşı mülkü ve bir tarafdan Yuvan nâm zimmî mülkü ve bir tarafdan Çavuşbaşı kızı Sâliha nâm hatun mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir matbah ve bir bâb tahtânî oda ve dehlîz ve kenîf ve bir kuyu ve zât-ı eşcâr-ı müsmire ve gayr-ı müsmire bahçe ve havluyu müştemil mülk menzilini cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mûmâ-ileyh Ali Efendi’ye iki yüz guruşa bey‘ ve teslîm onlar dahi Sultan Mehmed Hân Câmi‘-i şerîfi’nde vaz‘ eyledikleri dersiyye için vakf eylediği nukūdu akāra tebdîl şart olmağla yedinde olan mâl-ı vakf-ı mezbûr ile iştirâ ve kabz ve tesellüm eylediğinden sonra semeni olan meblağ-ı mezbûru müvekkil-i mûmâ-ileyh yedinden vech-i muharrer üzere müvekkilem için tamamen ahz u kabz eyledim fîmâ-ba‘d menzil-i mezbûrda zevcem müvekkile-i mezbûrenin alâka ve medhali kalmayıp vakf-ı mezbûrun musakkafâtından olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 min-Cumâdelâhire sene 1121 Şuhûdü’l-hâl: Mustafa Ağa b. Ahmed, Ahmed Çavuş, Mustafa Bey b. Yahya, İbrahim Çelebi Müezzin, Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Osman Çelebi b. Hasan ve gayruhum mine’l-huzzâr.