Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 380 Hüküm no: 415 Orijinal metin no: [57a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokona bt. Dimitraki ile Yorgi v. Yani’nin Gül Camii Mahallesi’ndeki menzil ve müştemilâtındaki hisselerini İstefan v. Cani’ye sattıkları Mahmiye-i İstanbul’da Gül Câmi‘-i şerîfi Mahallesi sükkânından kendi tarafından asıl ve Kokona bt. Dimitraki nâm Nasrâniye tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân Mehmed Çelebi b. Abdürrezzak ve Hüseyin Çelebi b. İvaz şehâdetleriyle şer‘an sâbit olan Yorgi v. Yani nâm zimmî meclis-i şer‘-i şerîf-i enverde bi’l-asâle ve bi’l-vekâle işbu râfi‘u’l-vesîka İstefan v. Cani nâm zimmî muvâcehesinde ikrâr ve takrîr-i kelâm edip mahalle-i mezkûrede vâki‘ bir tarafdan Pelaş nâm zimmî menzili ve bir tarafdan Dimitraşko nâm zimmî mülkü ve bir tarafdan leb-i deryâ ve bir tarafdan tarîk-i âm ile mahdûd fevkānî üç bâb oda ve bir tahta-pûş ve sofa ve dehlîz ve kenîf ve vustânî üç bâb oda ve dehlîz ve tahtânî bir matbah ve kiler ve cüneyne ve kenîf ve bodrum ve kayıkhâneyi müştemil mülk menzilin dört sehmden bir sehmi müvekkile-i mezkûrenin ve bir sehmi benim mülk ve hakkımız olmağla zikr olunan iki sehm hisse-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm İstefan’a otuz bin akçeye bey‘ ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan meblağ-ı mezkûr otuz bin akçeyi mezkûr İstefan yedinden bi’t-tamam ve’l-kemâl ahz u kabz eyledim baʻde’l-yevm menzil-i mahdûd-ı mezkûrun ber-vech-i meşrûh iki sehm hisse-i şâyi‘ası mezkûr İstefan’ın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 min-Cumâdelâhire sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Mustafa, Hüseyin Çelebi b. Hasan, Osman Çelebi b. Hasan ve gayruhum mine’l-huzzâr. Papa Yani v. Esteryo, Dimitraki v. Yorgi, Tanaş v. İstrati, Yani v. Panayot, Kostantin v. Kirkori, Petro v. Tarandafilo.