Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 381 Hüküm no: 416 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka Şahin b. Abdullah’ın Tahtakale çeşmesindeki gediğini satıp parasını aldığı Mustafa b. Hüseyin’den tekrar para talebiyle açtığı davanın reddedildiği Saka tâifesinden Şahin b. Abdullah nâm kimesne meclis-i şer‘-i şerîf-i enverde yine tâife-i mezbûreden işbu hâfızü’l-kitâb Mustafa b. Hüseyin nâm kimesne mahzarında üzerine da‘vâ ve takrîr-i kelâm edip târih-i kitâbdan iki sene mukaddem mahmiye-i İstanbul’da Tahtakale çeşmesinde vâki‘ bir hisse arka sakası gediğini ben gāib ani’l-meclis ( ) nâm kimesneden yüz guruş bedel ile ahz edip ba‘dehû sakabaşı ma‘rifetiyle ol gediği işbu mezbûr Mustafa’ya ben noksan-ı fâhiş seksen guruş bedel mukābelesinde ferağ ve tefvîz ol dahi vech-i meşrûh üzere tefevvüz ve kabûl ve def‘-i bedel-i mezkûr etmişidi lâkin zikr olunan saka gediği bedelinden noksan yirmi guruşu tekmîle mezbûr Mustafa’ya tenbîh olunmak matlûbumdur dedikde müdde‘î-i mezbûrun takrîr-i meşrûhu üzere da‘vâsı meşrû‘a olmayıp merkūm Mustafa’ya suâl dahi tevcîh etmemeğin bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 26 min-Cumâdelâhire sene 1121 Şuhûdü’l-hâl: Yiğitbaşı Mukdim b. Abdi, Mustafa Çelebi b. Şa‘ban, Süleyman b. Abdullah, Ali b. İvaz, Çalık Mehmed, Ali b. Bâli ve gayruhum mine’l-huzzâr.