Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 383 Hüküm no: 419 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Hacı Osman’ın evini istiğlal yoluyla Râbia Hatun Vakfı’na satıp tekrar kiraladığı Mahmiye-i İstanbul’da Âşıkpaşa Mahallesi sükkânından el-Hâc Mehmed b. el-Hâc Osman nâm kimesne meclis-i şer‘-i şerîf-i enverde ashâb-ı hayrâtdan merhûme Râbia Hatun nâm sâhibetü’l-hayrın vakfına bi’l-fi‘il mütevellî olan Ebûbekir Ağa b. Mahmud Efendi mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Atâullah Efendi menzili ve bir tarafdan merhûme Âsûde Sultan türbesi ve bir tarafdan Türbedâr İbrahim Çelebi menzili ve bir tarafdan tarîk-i âm ile mahdûd dâhilen ve hâricen büyût-ı adîdeyi muhtevî mülk menzilimi bi-tarîkı’l-istiğlâl mütevellî-i merkūm Ebûbekir Ağa’ya yüz guruşa bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eyleyip semeni olan meblağ-ı mezbûr yüz guruşu asl-ı mâl-ı vakf-ı mezbûrdan olmak üzere bana teslîm ben dahi ahz u kabz eylediğimden sonra mütevellî-i merkūm Ebûbekir Ağa yine menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç sene tamamına değin kırk sekiz guruşa bana îcâr ve teslîm ben dahi istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelâhire sene 1121 Şuhûdü’l-hâl: Halil Efendi b. Mustafa el-İmâm, İbrahim Efendi b. Mehmed el-Müezzin, el-Hâc Hasan b. Receb el-Mübâşir, Hasan b. Abdullah, Ali Beşe b. Abdullah, Mehmed Ağa b. Abdullah, Mustafa Çelebi b. Şa‘ban, Ali Beşe b. Bâli diğer Ali Çelebi b. Abdullah, Mehmed Beşe b. Abdurrahman ve gayruhum mine’l-huzzâr.