Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 384 Hüküm no: 420 Orijinal metin no: [57b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hadice bt. Nebi’yi bırakıp giden kocası Ahmed b. Mehmed’in ödemesi şartıyla ihtiyaçları için nafaka takdir edildiği Mahmiye-i İstanbul’da Muhtesib İskender Mahallesi’nde sâkine olup zâtı Ömer b. Mehmed ve Osman b. Mehmed nâm kimesneler ta‘rîfleriyle mu‘arrefe olan işbu râfi‘atü’l-kitâb Şerife Hadice bt. Nebi nâm hatun meclis-i şer‘-i şerîf-i enverde takrîr-i kelâm ve tâʻbir ani’l-merâm edip zevcim Ahmed b. Mehmed nâm kimesne beni bilâ-nafaka terk edip diyâr-ı âhara gitmekle nafaka ve kisveye zarûret ve ihtiyâcım olmağın zevcim gāib-i mezbûr üzerine kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde ba‘de’t-tahlîfü’ş-şer‘î hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri mezbûre Şerife Hadice’nin nafaka ve kisve-bahâsıʼçün gāib-i mezbûr Ahmed üzerine beher yevm üçer para farz ve takdîr edip [58a] meblağ-ı mefrûz-ı mezkûru nafaka ve kisve ve sâir mesârif-i lâzımesine harc u sarfa ve hîn-i zarûretde istidâneye ve lede’z-zafer zevci gāib-i mezbûr Ahmed üzerine rücû‘a mezbûre Şerife Hatice’ye izin vermeğin mâ-vaka‘a bi’t-taleb ketb olundu. Fî 28 min-Cumâdelâhire sene 1121 Şuhûdü’l-hâl: Mehmed Ağa Kethüdâ-yı muhzırân, Abdullah b. Abdurrahman, Ali Çelebi b. İvaz, Hasan b. Abdullah, Çalık Mehmed b. Abdullah, Mehmed b. Abdullah, Ömer Çelebi b. Ahmed, Osman Çelebi b. Mehmed, Süleyman b. Abdullah, Ali Beşe b. Bâli, Hasan b. Abdülbâki, Hüseyin b. Hasan ve gayruhum mine’l-huzzâr.