Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 384 Hüküm no: 421 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rukiye bt. Mehmed ile Vildan bt. Abdullah’ın ortak oldukları evlerini müştemilâtıyla birlikte Halil Çelebi b. Abdurrahman’a sattıkları Mahmiye-i İstanbul’da Çerâğī Hamza Mahallesi sâkinelerinden Şerife Rukiye bt. Mehmed ve Vildan bt. Abdullah nâm hatunların zâtları İmâm Mehmed Efendi b. Mehmed ve Salih Çelebi b. ( ) nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i enverde işbu râfi‘u’l-kitâb Halil Çelebi b. Abdurrahman nâm kimesne mahzarında her biri ikrâr ve takrîr-i kelâm edip akd-i âti’z-zikrin sudûruna değin iştirâki’s-seviyy üzere yedimizde mülk ve hakkımız olup mahalle-i mezbûrede vâki‘ bir tarafdan Goşi? Efendi veresesi mülkleri ve bir tarafdan vakıf odalar ve bir tarafdan Şahin nâm kimesne mülkü ve bir tarafdan tarîk-i âm ile mahdûd fevkānî iki bâb oda ve bir matbah ve bir kenîf ve bir mikdâr havluyu müştemil mülk menzilimizi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Halil Çelebi’ye iki yüz guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz guruşu her birimiz bi-kadri’l-hısas mezbûr Halil Çelebi yedinden tamamen ahz u kabz eyledik baʻde’l-yevm menzil-i mahdûd-ı mezkûr cemî‘ müştemilâtıyla mezbûr Halil Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-Cumâdelâhire sene 1121 Şuhûdü’l-hâl: Fahrü’l-müderrisîni’l-kirâm Hasan Efendi b. Hüseyin Efendi, Umdetü’l-kuzât Mustafa Efendi b. Abdullah, Mefharü’l-kuzât Yusuf Efendi b. Mehmed Efendi, Umdetü erbâbi’t-tahrîr ve’l-kalem Hâfız Mustafa Efendi b. Ahmed, Mehmed Odabaşı b. İbrahim, el-Hâc Yusuf Attâr, Mustafa Çelebi b. Hüseyin, Ali Beşe b. Mehmed, el-Hâc Mustafa b. Hüseyin, Mustafa b. Şa‘ban, Ali b. İvaz, Hasan b. Mustafa, Ali b. Bâli ve gayruhum mine’l-huzzâr.