Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 385 Hüküm no: 422 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Yunus Mahallesi’nden Sâliha bt. Abdullah’ın kocası İbrahim b. Mehmed’den boşandığı Mahmiye-i İstanbul’da Hoca Yunus Mahallesi sâkinelerinden olup zâtı ma‘rifet-i şer‘iyye ile ârifân Mehmed b. İbrahim ve İbrahim b. Mustafa ta‘rîfleriyle mu‘arrefe olan Sâliha bt. Abdullah nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb İbrahim b. Mehmed nâm kimesne mahzarında ikrâr ve takrîr-i kelâm edip zevcim mezbûr İbrahim beni bâyinen tatlîk etmekle zimmetinde mütekarrer ve ma‘kūdün-aleyh olan üç bin altı yüz akçe mehr-i müeccelimin bin sekiz yüz akçesini nakd ve mecmû‘u bin sekiz yüz akçe kıymetli dört sahan ve bir tencere ve bir seccâde ve bir beylik yan döşemesi ve bir yüz yasdığı ve bir kefkir ve bir kefçe ve bir köhne yorgan ve bir köhne beyaz velençe ve bir yasdık yüzü ve bir tekne ve bir balta ve bir sacayak ile nafaka-i iddet ve meûnet-i süknâm için bi’t-terâzî ta‘yîn olunan dört yüz seksen akçe ki cem‘an dört bin seksen akçe hakkımı zevcim mezbûr İbrahim bana def‘ ü teslîm ben dahi yedinden tamamen ahz u kabz eyledim baʻde’l-yevm hukūk-ı zevciyete müte‘allika olan âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Cumâdelâhire sene 1121 Şuhûdü’l-hâl: Mehmed b. İbrahim, İbrahim b. Mustafa, Hasan b. Mustafa, Receb b. Bayram, Ali Çelebi b. İvaz ve gayruhum mine’l-huzzâr.