Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 386 Hüküm no: 423 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamavî Seyyid Mehmed Çelebi b. Seyyid Hüseyin b. Ali’nin çocukları Hüseyin ve Abdülkâfî’nin babalarının Mekke kadısı Cevvîzâde Atâullah Efendi’de alacağı olduğu iddiasıyla açtıkları davanın reddedildiği Husûs-ı âti’l-beyânın mahallinde istimâ‘ ve tahrîri için bi’l-iltimâs bu fakīr Dârü’l-hilâfeti’l-aliyye Kostantıniyyeti’l-mahmiye mahallâtından Harâccı Muhyiddin Mahallesi ahâlîsinden olup muvakkaten Mekke-i mükerreme kādısı olan a‘lemü’l-ulemâi’l-mütebahhirîn efdâlü’l-fuzalâi’l-müteverri‘în fazîletli Cevvîzâde Atâullah Efendi hazretlerinin sa‘âdethânelerine varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf olundukda mahmiye-i mezbûrede Hoca Hamza Mahallesi’nde sâkin iken bundan akdem vefât eden Hamavî es-Seyyid Mehmed Çelebi b. es-Seyyid Hüseyin b. Ali’nin sulbî sagīr oğulları Hüseyin ve Abdülkâfî’nin vasiyy-i muhtârları el-Hâc İbrahim b. Fazlı meclis-i ma‘kūd-ı mezkûrda sâhibü hâze’l-kitâb müşârun-ileyh Atâullah Efendi hazretlerinin mahzarında üzerine da‘vâ ve takrîr-i kelâm edip müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali’nin müşârun-ileyh Atâullah Efendi hazretleri zimmetinde cihet-i deyn-i şer‘îden elli guruş hakkı olup merkūm Hamavî es-Seyyid Mehmed Çelebi meblağ-ı mezbûru kable’l-ahz fevt olmağla meblağ-ı mezbûr sagīrân-ı mezbûrâna isâbet ve intikāl etmeğin vesâyetim hasebiyle taleb ederim suâl olunsun dedikde gıbbe’s-suâl müşârun-ileyh Atâullah Efendi hazretleri cevâbında fi’l-hakīka müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali’ye cihet-i deyn-i şer‘îden elli guruş deyni olduğunu ikrâr lâkin meblağ-ı mezbûr elli guruşu müteveffâ-i mezbûra fevtinden bir sene mukaddem huzûr-ı Müslimînde edâ ve teslîm ol dahi yedimden ahz u kabz edip meblağ-ı mezbûr elli guruşdan zimmetimde bir akçe ve bir habbe bâkī kalmamışdır deyü def‘le mukābele edicek gıbbe’l-istintak ve’l-inkâr müşârun-ileyh Atâullah Efendi hazretlerinden def‘-i meşrûhunu mübeyyine beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Üskübî Mahallesi’nde sâkin el-Hâc Mehmed b. İvaz ve Hoca Halil Attâr Mahallesi’nde sâkin Mahmud Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka işbu müşârun-ileyh Atâullah Efendi hazretleri müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali’ye cihet-i deyn-i şer‘îden zimmetinde deyni olan meblağ-ı mezbûr elli guruşu müteveffâ-i mezbûra fevtinden bir sene mukaddem bizim huzûrumuzda tamamen def‘ ü teslîm ol dahi yedinden bi’t-tamam ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye <> ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince vasiyy-i mezbûr meblağ-ı mezkûr mutâlebesinden bî-vech mu‘ârazadan men‘-birle mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Es-Seyyid Osman Çelebi b. es-Seyyid Abdurrahman, Hüseyin Çelebi b. Mehmed, Ahmed Efendi Behnesîzâde?, Mehmed Çelebi Takazâde, Çukadâr Mustafa Çelebi, Hacı Ahmed Çelebi, el-Hâc Ahmed b. Mehmed, Mustafa Çelebi b. İvaz, Hasan Çelebi b. İvaz ve gayruhum mine’l-huzzâr.