Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 387 Hüküm no: 424 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamavî Seyyid Mehmed Çelebi b. Seyyid Hüseyin b. Ali’nin çocukları Hüseyin ve Abdülkâfî’nin babalarının alacağı olduğu iddiasıyla Osman Ağa b. Musa’ya açtıkları davada Osman Ağa’nın borcu olmadığını ispat ettiği Husûs-ı âti’l-beyânın mahallinde istimâ‘ ve tahrîri için bi’l-iltimâs bu fakīr Dârü’l-hilâfeti’l-aliyye Kostantıniyyeti’l-mahmiye mahallâtından Harâccı Muhyiddin Mahallesi ahâlîsinden olup muvakkaten Mekke-i mükerreme kādısı olan a‘lemü’l-ulemâi’l-mütebahhirîn efdâlü’l-fuzalâi’l-müteverri‘în fazîletli Cevvîzâde Atâullah Efendi hazretlerinin sa‘âdethânelerine varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i nebevî olundukda mahmiye-i mezbûrede Hoca Hamza Mahallesi’nde sâkin iken bundan akdem vefât eden Hamavî es-Seyyid Mehmed Çelebi b. es-Seyyid Hüseyin b. Ali’nin sulbî sagīr oğulları Hüseyin ve Abdülkâfî’nin vasiyy-i muhtârları olan el-Hâc İbrahim b. Fazlı meclis-i ma‘kūd-ı mezkûrda müşârun-ileyh Atâullah Efendi hazretlerinin kethüdâsı olan sâhibü hâze’l-kitâb Osman Ağa b. Musa mahzarında bi’l-vesâye üzerine da‘vâ ve takrîr-i kelâm edip müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali hayâtında bin yüz on sekiz senesi Şevvâl’inin on beşinci gününde işbu yedimde olan temessük nâtık olduğu üzere on top dîbâ ve bir elmas yüzük ve bir sim rahtını mezbûr Osman Ağa’ya bi-safkatin vâhidetin yedi yüz elli guruşa bey‘ ve temlîk ve teslîm ol dahi yedinden iştirâ ve temellük ve tesellüm eyledikden sonra semeni olan meblağ-ı mezbûru kable’l-ahz fevt olmağla meblağ-ı mezbûr sagīrân-ı mezbûrâna isâbet ve intikāl etmeğin vesâyetim hasebiyle taleb ederim suâl olunsun dedikde gıbbe’s-suâl mezbûr Osman Ağa cevâbında fi’l-hakīka târih-i mezkûrda eşyâ-i muharrere-i mezkûreyi ber-vech-i muharrer müteveffâ-i mezbûrdan iştirâ ve tesellüm ve zikr olunan temessüğü yedine def‘ ü teslîm etmişidim lâkin yine târih-i mezbûrda müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali ile bi’t-terâzî bey‘-i mezbûru fesh ve ikāle edip zikr olunan on top dîbâ ve bir elmas yüzük ve bir sim rahtın a‘yânını bi-tamâmihâ müteveffâ-i mezbûra def‘ ü teslîm ol dahi yedimden ahz u kabz edip lâkin zikr olunan temessük gafleten şak olunmayıp müteveffâ-i mezbûrun üzerinde kalmışidi deyü def‘le mukābele edicek gıbbe’l-istintak ve’l-inkâr müdde‘î-i mezbûr Osman Ağa’dan def‘-i meşrûhunu mübeyyine beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Hoca Halil Attâr Mahallesi’nde sâkin Mahmud Çelebi b. Mehmed ve Sarı Demirci Mahallesi’nde sâkin Mehmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-i mezbûr Hamavî es-Seyyid Mehmed Çelebi b. es-Seyyid Hüseyin b. Ali hayâtında bin yüz on sekiz senesi Şevvâl’inin on beşinci gününde işbu temessük nâtık olduğu [üzere] on top dîbâ ve bir elmas yüzük ve bir sim rahtını işbu müdde‘î-i mezbûr Osman Ağa’ya bi-safkatin vâhidetin yedi yüz elli guruşa bey‘ ve temlîk ve teslîm ol dahi yedinden iştirâ ve temellük ve tesellüm eyledikden sonra merkūm Osman Ağa yine târih-i mezbûrda müteveffâ-i mezbûr Hamavî es-Seyyid Mehmed <<Çelebi b. es-Seyyid Hüseyin b.>> ile bi’t-terâzî bey‘-i mezbûru fesh ve ikāle ve eşyâ-i mezbûrenin bi-tamâmihâ a‘yânını müteveffâ-i mezbûra bizim huzûrumuzda redd ü teslîm ol dahi ahz u kabz edip lâkin zikr olunan temessük gafleten şak olunmayıp müteveffâ-i mezbûrun üzerinde kalmışidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince vasiyy-i mezbûr meblağ-ı mezbûr mutâlebesiyle bî-vech mu‘ârazadan men‘-birle mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Es-sâbikūn, es-sâbikūn, es-sâbikūn.