Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 388 Hüküm no: 425 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Mehmed’in talebiyle boşandığı kocası Osman b. Ali’nin ödemesi şartıyla küçük kızları Fâtıma’nın ihtiyaçları için nafaka takdir edildiği Mahmiye-i İstanbul’da Pirinççi Sinan Mahallesi’nde sâkine olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Zeyneb bt. Mehmed nâm hatun meclis-i şer‘-i şerîf-i enverde zevc-i sâbıkı Osman b. Ali nâm kimesne mahzarında takrîr-i kelâm ve tâʻbir ani’l-merâm edip mezbûr Osman’ın firâşından hâsıla ve benden mütevellide bi-hakkı’l-hıdâne hâlâ hacr u terbiyemde olan sadriye sagīre kızım Fâtıma’ya kıbel-i şer‘den babası mezbûr Osman üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûre Fâtıma’ya tarafeynin rızâlarıyla târih-i kitâbdan beher yevm beşer akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin levâzımına harc u sarfa ve lede’z-zarûre istidâneye ve inde’z-zafer mezbûr Osman üzerine rücû‘a mezbûre Zeyneb’e kıbel-i şer‘den izin vermeğin mâ-vaka‘a bi’t-taleb ketb olundu. Fî-selhi Cumâdelâhire sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Abdullah b. Abdullah, Ali b. Bâli, Çalık Mehmed ve gayruhum mine’l-huzzâr.