Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 389 Hüküm no: 426 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despina bt. Koçi’nin Bayezid Ağa Mahallesi’ndeki evini Ali Çavuş Vakfı’na istiğlal yolu ile satıp tekrar kiraladığı Mahmiye-i İstanbul’da Topkapısı kurbünde Bayezid Ağa Mahallesi sâkinelerinden olup zâtı ta‘rîf-i şer‘î ile mu‘arrefe olan Despina bt. Koçi nâm Nasrâniye mahfil-i kazâda merhûm Ali Çavuş Vakfı’na bi’l-fi‘il mütevellî olan işbu râfi‘u’l-kitâb Mehmed Çelebi b. Abdi nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Nefuz? Ermeni mülkü ve bir tarafdan Kireççi Duka mülkü ve bir tarafdan tarîk-i hâs ile mahdûd ma‘lûmü’l-müştemilât mülk menzilimi mütevellî-i mezbûra yüz yetmiş guruşa bi-tarîkı’l-istiğlâl bey‘ ve teslîm eylediğimde ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabûl eylediğinden sonra semeni olan meblağ-ı mezbûr yüz yetmiş guruşu mütevellî-i mezbûr yedinden tamamen ahz u kabz eylediğimden sonra menzil-i mahdûd-ı mezkûru mütevellî-i mezbûr gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi Cumâdelûlâ gurresinden bir sene tamamına değin yine bana yirmi beş buçuk guruşa îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mezbûre Despina mahfil-i mezkûrda Mustafa Çelebi b. ( ) nâm kimesne mahzarında ikrâr ve takrîr-i kelâm edip menzil-i mahdûd-ı mezbûr hakīkatde rehin ve meblağ-ı mezbûr zimmetimde deyn olmağla müddet-i mezbûre tamamında asl-ı mâl-ı mezkûr ile ücret-i mezbûreyi edâ ve menzil-i mezbûrun fekki müyesser olmaz ise menzil-i mezbûru semen-i misli ile âhara bey‘ ve semeninden deyn-i mezkûru edâya akd-i rehnde meşrûta küllemâ azeltüke fe-ente vekîlî mazmûnu üzere azl ve in‘izâlden masûne vekâlet-i devriye ile tarafımdan mezbûr Mustafa Çelebi’yi vekîl ve nâib-i menâb nasb u ta‘yîn eyledikde ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’l-mer‘î mâ-vaka‘a [59a] bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Mustafa Efendi b. Ahmed, Mustafa Bey b. Ahmed, Mehmed b. Mehmed el-Müezzin, Ahmed Efendi b. Mustafa el-İmâm, Mustafa Efendi b. Müstakīm, Mehmed Efendi b. Ahmed, Mehmed b. Hasan, Siyavuş Bey b. Abdullah, İmâmzâde Halil b. Ahmed, el-Hâc Ali b. Abdullah, Osman b. Abdullah, Mustafa b. Şa‘ban, Ali b. İvaz, Hasan b. Mustafa, Ali b. Bâli ve gayruhum mine’l-huzzâr.