Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 389 Hüküm no: 427 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Hacı Ahmed’in talebiyle boşandığı kocası Halil b. Hüseyin’in ödemesi şartıyla çocukları İbrahim’e nafaka takdir edildiği Mahmiye-i İstanbul’da el-Hâc İsa Mahallesi’nde sâkine olup zâtı ta‘rîf-i şer‘î ile mu‘arrefe olan Ümmühani bt. el-Hâc Ahmed nâm hatun meclis-i şer‘-i şerîf-i enverde zevc-i sâbıkı Halil b. Hüseyin nâm kimesne mahzarında takrîr-i kelâm ve tâʻbir ani’l-merâm edip mezbûr Halil’in firâşından hâsıl ve benden mütevellide bi-hakkı’l-hıdâne hâlâ hacr u terbiyemde olan sadrî sagīr oğlum İbrahim’e kıbel-i şer‘den babası mezbûr Halil üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīr-i mezbûr İbrahim’e tarafeynin rızâlarıyla târih-i kitâbdan beher yevm beşer akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīr-i mezbûrun levâzımına harc u sarfa ve lede’l-iktizâ istidâneye ve inde’z-zafer mezbûr Halil üzerine rücû‘a mezbûre Ümmühani’ye kıbel-i şer‘den izin vermeğin mâ-vaka‘a bi’t-taleb ketb olundu. Fî-selhi Cumâdelâhire sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.