Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 390 Hüküm no: 428 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. Hacı Mehmed’in Karaki Mahallesi’ndeki arsasının bir bölümünü Hacı Ali Efendi b. Hacı Yusuf’a hibe ettiği Mahrûse-i Galata mahallâtından Okçu Musa Mahallesi’nde sâkin el-Hâc Ahmed b. el-Hâc Mehmed nâm kimesne meclis-i şer‘-i şerîf-i enverde mefharü erbâbi’t-tahrîr ve’l-kalem el-Hâc Ali Efendi b. el-Hâc Yusuf tarafından husûs-ı âti’z-zikri tasdîka vekîl-i şer‘îsi olan el-Hâc Yusuf b. Mahmud mahzarında ikrâr ve takrîr-i kelâm edip yedimde mülk ve hakkım olup mahmiye-i İstanbul’da Karaki Mahallesi’nde vâki‘ bir tarafdan Sarrac Hüseyin Vakfı olan dekâkîn ve mekteb ve bir tarafı İbrahim Halîfe mülkü ve iki tarafı tarîk-i âm ile mahdûd mülk menzilimin İbrahim Halîfe tarafından tûlen yirmi beş zirâ‘ ve arzen bir zirâ‘ mülk arsamı ifrâz ve alâmet-i fâsıla vaz‘ eylediğimden sonra arsa-yı mezkûreyi müvekkil-i mezbûr el-Hâc Ali Efendi’ye hibe-i sahîha-i şer‘iyye ile hibe ve teslîm edip ol dahi ber-vech-i muharrer meclis-i hibede ittihâb ve tesellüm ve kabz ve kabûl eyledi baʻde’l-yevm arsa-yı mahdûde-i mezkûre müvekkil-i mûmâ-ileyh el-Hâc Ali Efendi’nin mülk-i mevhûbudur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-selh min-Cumâdelâhire sene 1121 Şuhûdü’l-hâl: el-Hâc Eyüb b. Osman, el-Hâc Ömer b. İslam, el-Hâc Ali b. el-Hâc Yusuf, el-Hâc Halil b. İbrahim, Musa Beşe b. Mehmed, el-Hâc Hasan b. el-Hâc Mehmed, Ali Çelebi b. Muharrem, Mustafa b. İvaz, el-Hâc Ali b. Abdullah, Mustafa b. el-Hâc Mehmed, Mehmed b. Ahmed, Ali b. İvaz ve gayruhum mine’l-huzzâr.