Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 391 Hüküm no: 429 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. Hacı Mehmed’in Karaki Mahallesi’ndeki evini müştemilâtıyla birlikte Hacı Ali b. Hacı Yusuf’a sattığı Mahrûse-i Galata mahallâtından Okçu Musa Mahallesiʼnde sâkin el-Hâc Ahmed b. el-Hâc Mehmed nâm kimesne meclis-i şer‘-i şerîf-i enverde sâbıkā başhalîfe olan umdetü erbâbi’t-tahrîr ve’l-kalem el-Hâc Ali b. el-Hâc Yusuf tarafından husûs-ı âti’z-zikri tasdîka vekîl-i şer‘îsi olan el-Hâc Yusuf b. Mahmud nâm kimesne mahzarında ikrâr ve takrîr-i kelâm edip mahmiye-i İstanbul’da Karaki Mahallesiʼnde vâki‘ bir tarafdan Sarrac Hüseyin Vakfı olan dekâkîn ve mekteb ve bir tarafdan müşteri-i mezbûr el-Hâc Ali Efendi’nin mülk-i mevhûbu arsa ve iki tarafı tarîk-i âm ile mahdûd dâhiliyesi tahtânî üç bâb oda ve iki sofa ve bir mahtab ve bir matbah ve bir kiler ve bir bi’r-i mâ ve kenîf ve hâriciyesi fevkānî bir bâb kebîr oda ve bir sofa ve tahtânî üç bâb oda ve kebîr sofa ve bir kenîf ve bi’r-i mâ ve ahır ve bahçe ve bi’r-i mâyı müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr el-Hâc Ali Efendi’ye iki bin beş yüz guruşa bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi ber-vech-i muharrer iştirâ ve tesellüm ve temellük ve kabûl ve kabz ettiğinden sonra semeni olan meblağ-ı mezbûr iki bin beş yüz guruşu müvekkil-i mezbûr el-Hâc Ali Efendi yedinden tamamen ahz u kabz eyledim baʻde’l-yevm menzil-i mahdûd-ı mezkûr müvekkil-i mezbûr el-Hâc Ali Efendi’nin mülk-i müşterâsı ve hakk-ı sırfıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd sene 1121 Şuhûdü’l-hâl: Es-sâbikūn, es-sâbikūn, es-sâbikūn