Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 391 Hüküm no: 430 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah b. Abdurrahman’ın evini müştemilâtıyla birlikte küçük kızı Ayşe adına babası Receb Beşe b. Abdullah’a istiğlal yoluyla satıp tekrar kiraladığı Mahmiye-i İstanbul’da Debbâğ Yunus Mahallesiʼnde sâkin Mustafa b. Abdullah b. Abdurrahman nâm kimesne mahfil-i kazâda bundan akdem vefât eden Gülbûy bt. Abdullah nâm hatunun sadriye sagīre kızı Âişe’nin velîsi ve babası işbu râfi‘u’l-kitâb Receb Beşe b. Abdullah nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Kabahasırcı Ali Beşe menzili ve iki tarafdan Hasırcı el-Hâc Mehmed menzili ve bir tarafdan tarîk-i âm ile mahdûd ma‘lûmü’l-müştemilât mülk menzilimi bi-tarîkı’l-istiğlâl mezbûr Receb Beşe’ye altmış guruşa bey‘ ve teslîm eylediğimde ol dahi sagīre-i mezbûrenin vâlidesi müteveffât-ı mezbûreden müntakil mâlıyla iştirâ ve tesellüm edip semeni olan meblağ-ı mezbûr altmış guruşu mezbûr Receb Beşe yedinden tamamen ahz u kabz eylediğimden sonra menzil-i mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yine bana dokuz guruşa îcâr ve teslîm eyledi dedikde gıbbe’t-tasdîkı’ş-şer‘î mezbûr Mustafa meclis-i mezkûrda el-Hâc Mehmed b. el-Hâc Receb nâm kimesne mahzarında ikrâr ve takrîr-i kelâm edip menzil-i mezbûr hakīkatde rehin ve meblağ-ı mezbûr zimmetimde deyn olmağla müddet-i mezkûre tamamında asl-ı mâl-ı mezbûr ile ücret-i mezkûreyi edâ müyesser olmaz ise menzil-i mezbûru semen-i misli ile âhara bey‘ ve semeninden deyn-i mezkûru edâya akd-i rehnde meşrûta vekâlet-i devriye ile tarafımdan mezbûr el-Hâc Mehmed’i vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd sene 1121 Şuhûdü’l-hâl: Kethüdâ Mustafa Efendi b. Hüseyin, Hasan Çavuş b. Abdullah, Mehmed Bey‘ b. Müslim, Hüseyin Beşe b. Abbas, Abdullah b. Abdullah, Mustafa b. Şa‘ban, Mehmed Efendi b. Yusuf, Ali b. İvaz ve gayruhum mine’l-huzzâr.