Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 392 Hüküm no: 431 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debronya mukataası reayalarının kendilerinden fazla cizye tahsil eden Dizdar Mustafa Ağa b. Bayezid’den on bin akçe alıp Mustafa Ağa’ya olan borçlarına mahsup ettikleri Vilâyet-i Rumeli’nde Delvine kazâsına tâbi‘ Debronya mukāta‘ası tımarı re‘âyâlarından olup kendi taraflarından asıl ve sâir ma‘lûmü’l-esâmî ve mahsûrü’l-eşhâs zimmîler taraflarından nehc-i şer‘î üzere vekîl olan Papa Mizo v. Papa Margrid ve Mozo v. Mato ve Yorgo v. Lako ve Kiryo v. Yazıcı? ve Mato v. Yazıcı? ve Moz? v. Andriç nâm zimmîler meclis-i şer‘-i şerîf-i enverde işbu râfi‘u’l-kitâb kal‘a-i mezbûre dizdârı Mustafa Ağa b. Bayezid nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip bundan akdem mezbûr Mustafa Ağa’ya bin yüz on sekiz senesinden târih-i kitâb senesine gelince karyemizin re‘âyâlarının cizye ve sâir evâmir-i aliyye ile vârid olan tekâlifi sen cibâyet etmenle her sene altışar bin akçe ziyâde ahz etmişidin deyü da‘vâ ve ol dahi inkâr etmeğin beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremizden bizi mezbûr Mustafa Ağa ile an-inkârin on bin akçe üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr on bin akçeyi karye-i mezbûre re‘âyâlarının cihet-i deyn-i şer‘îden mezbûr Mustafa Ağa’ya deynleri olan yirmi dört bin akçenin on bin akçesine takās eylediğinde biz dahi mukāssa ve kabûl edip husûs-ı mezbûra müte‘allika âmme-i da‘vâdan bi’l-asâle ve bi’l-vekâle mezbûr Mustafa Ağa’nın zimmetini ibrâ-i âm ile ibrâ ve iskāt eylediklerinde gıbbe’t-tasdîkı’ş-şer‘î mezbûr Mustafa Ağa meclis-i mezkûrda mezbûrûn zimmîler muvâcehelerinde ikrâr ve takrîr-i kelâm edip mezbûrûn zimmîler kal‘a-i mezbûre dizdârlarına kadîmden ber-vech-i maktû‘ on sekiz bin akçe veregelmeleriyle baʻde’l-yevm ben meblağ-ı mezbûr on sekiz bin akçenin üç bin akçesini aşağı varıp her sene on beş bin akçe alıp on beş bin akçeden ziyâde bir akçe dahi almamak üzere ta‘ahhüd eyledim dedikde gıbbe’t-tasâdıkı’ş-şer‘î mâ-vaka‘a bi’t-taleb ketb olundu. Fî 9 min-Cumâdelâhire sene 1121 Şuhûdü’l-hâl: Mustafa b. Şa‘ban, Ali Çelebi b. Bâli, Hasan Çelebi b. Mustafa, Ali Çelebi b. İvaz, Hasan b. Abdullah, Hızır Ağa b. Ali Efendi, Ramazan tâbi‘-i Hızır Ağa, Ahmed Çelebi tâbi‘-i Hızır Ağa, Mustafa Çelebi Paçvârzâde?, Ebûbekir Çelebi, diğer Ebûbekir, Hüseyin tâbi‘-i Hızır Ağa, Hasan Çelebi b. Mustafa Çelebi.