Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 393 Hüküm no: 432 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Halil’in geçinemediği kocası İbrahim b. Mehmed’den boşandığı Mahmiye-i İstanbul’da Koca Mustafa Paşa Mahallesiʼnde sâkine olup zâtı ma‘rifet-i şer‘iyye ile ârifân Mehmed b. Ömer ve Ahmed b. Mehmed nâm kimesneler ta‘rîfleriyle mu‘arrefe olan Hadice bt. Halil nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb İbrahim b. Mehmed nâm kimesne mahzarında ikrâr ve takrîr-i kelâm edip zevcim mezbûr İbrahim ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan elli beş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr İbrahim ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete ve sâir târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan mezbûr İbrahim’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: Mustafa b. Şa‘ban, Hasan Çelebi b. Abdullah, Hasan Çelebi [b.] Abdullah, Ali Çelebi b. Bâli, Ali b. İvaz ve gayruhum mine’l-huzzâr.