Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 394 Hüküm no: 434 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emetullah bt. Ali Efendi’nin ceddi Mustafa’nın vakıf evine mütevellî olduktan sonra evi içinde kiracı olan Fâtıma bt. Murad’a tekrar kiraya verdiği Mahmiye-i İstanbul’da Sultan Selim kurbünde sâkine Şerife Emetullah bt. Ali Efendi nâm hatun mahfil-i kazâda zikri âtî menzile vâzı‘atü’l-yed olan Fâtıma bt. Murad nâm hatun mahzarında takrîr-i kelâm edip mahmiye-i mezbûrede Kabasakal Mahallesiʼnde vâki‘ bir tarafdan Çalık Çorbacı menzili ve bir tarafdan sâbıkā dülbend ağası olan Mehmed Paşa menzili ve bir tarafdan tarîk-i âm ile mahdûd olup hâlâ mezbûre Fâtıma’nın tasarrufunda olan menzili ceddim el-Hâc Mustafa nâm kimesne ile’l-inkırâz evlâdına ve evlâd-ı evlâdına [60a] ve evlâd-ı evlâd-ı evlâdına vakfetmekle bundan akdem müteveffât olan vâlidem diğer Fâtıma menzil-i mezbûru hayâtında yüz guruş icâre-i mu‘accele ve yevmî birer akçe ücret-i müeccele ile îcâr edip ba‘dehû fevt oldukda mu‘accelesi istîfâ olunup nevbet-i tasarruf bana intikāl eyledi deyü mezbûreden da‘vâ ve menzil-i mezbûru taleb eylediğimde ol dahi vakfiyesi zâyi‘a olmağla mülk olmak üzere iştirâ etmişidim deyü teslîmden imtinâ‘ etmekle mukaddemâ mahalle-i mezbûrede vâki‘ menzil-i mezbûrda sâkin olan Abdullah b. el-Hâc Hüseyin ve mukaddemâ mahalle-i mezbûrede sâkin olup hâlâ Ma‘cûncu Mahallesiʼnde sâkin Ahmed b. Abdullah nâm kimesneler babam mezbûr Ali Efendi’nin menzil-i mezkûr babası mezbûr el-Hâc Mustafa’nın vech-i meşrûh üzere evlâdına ve evlâd-ı evlâdına vakfıdır deyü ikrârına şehâdet ettiklerinden sonra mezbûre Fâtıma dahi vech-i meşrûh üzere vakfiyetini ikrâr etmekle suâl olunup takrîri tahrîr ve hüccet olunmak matlûbumdur dedikde gıbbe’s-suâl mezbûre Fâtıma cevâbında fi’l-hakīka menzil-i mezkûr mezbûre Şerife Emetullah’ın ceddi mezbûr el-Hâc Mustafa’nın vech-i meşrûh üzere evlâdına ve evlâd-ı evlâd-ı evlâdına vakfıdır deyü ikrâr u i‘tirâf ettiğinden sonra mezbûre Şerife Emetullah meclis-i mezbûrda mezbûre Fâtıma mahzarında hâkim-i muvakki‘-ı sadr-ı kitâb hazretleri tarafından vakf-ı mezbûra mütevellî nasb olundukdan sonra bi’t-tevliye ikrâr ve takrîr-i kelâm edip menzil-i mezkûru tevliyetim hasebiyle yevmî birer akçe ücret-i müeccele ile mezbûre Fâtıma’ya îcâr ve teslîm ol dahi ber-vech-i muharrer müceddeden istîcâr ve kabûl edip mukaddemâ zimmetinde kalan beynimizde ma‘lûme ücret-i müecceleye müte‘allika da‘vâdan mezbûre Fâtıma’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî evâhiri Cumâdelâhire sene 1121 Şuhûdü’l-hâl: Yahya Çelebi el-Muhzır, Mehmed Çelebi b. Mustafa, Mustafa Çavuş b. Ahmed, Ali Efendi b. Mehmed ve gayruhum mine’l-huzzâr.