Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 395 Hüküm no: 435 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Nikola v. Velço’nun kürk bedelinden olan borcunu Seyfullah Çelebi b. Abdullah’a ödemesi Mahmiye-i İstanbul’da Tercümân Yunus Mahallesiʼnde sâkinlerinden işbu râfi‘u’l-kitâb Seyfullah Çelebi b. Abdullah nâm kimesnenin vekîl-i müsecceli olan Solakzâde Mehmed Ağa b. Mustafa nâm kimesne meclis-i şer‘-i şerîf-i enverde Kürkçü Nikola v. Velço nâm zimmî muvâcehesinde üzerine da‘vâ ve takrîr-i kelâm edip müvekkilim mezbûr Seyfullah Çelebi’nin yedinden iştirâ ve kabz eylediği beynlerinde ma‘lûm çılkava kürk bahâsından mezbûr Nikola zimmetinde yüz üç guruş hakkı olup meblağ-ı mezbûru merkūm Nikola’dan bi’l-vekâle taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Nikola cevâbında fi’l-hakīka kaziyye minvâl-i muharrer üzere olup cihet-i mezkûreden müvekkil-i mezbûr Seyfullah Çelebi’ye el-ân zimmetimde edâsı lâzım yüz üç guruş deynim vardır deyü bi-tav‘ihi ikrâr u i‘tirâf etmeğin alâ-mûcebi i‘tirâfihî meblağ-ı mezbûr yüz üç guruşu vekîl-i mezbûr Mehmed Ağa’ya edâ ve teslîme merkūm Nikola’ya ba‘de’t-tenbîh mâ-vaka‘a bi’t-taleb ketb olundu. Fî 2 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Abdullah b. Abdullah, Ali b. Bâli, Hasan b. Mustafa ve gayruhum mine’l-huzzâr.