Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 399 Hüküm no: 441 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Abdullah’ın boşandığı kocası İbrahim Beşe b. İbrahim’deki mehir nafaka bedelini alıp zimmetini ibra ettiği Mahmiye-i İstanbul’da Gül Câmi‘-i şerîfi Mahallesiʼnde sâkine olup zâtı Mehmed b. Ahmed ve Mustafa b. Şa‘ban nâm kimesneler ta‘rîfleriyle mu‘arrefe olan Saime bt. Abdullah nâm hatun meclis-i şer‘-i şerîf-i enverde zevc-i mutallıkı işbu râfi‘u’l-kitâb İbrahim Beşe b. İbrahim nâm kimesne mahzarında ikrâr ve takrîr-i kelâm edip mezbûr İbrahim zevcim olup bundan akdem beni bâyinen tatlîk etmekle zimmetinde mütekarrer ve ma‘kūdün-aleyh mehr-i müeccelim olan beş yüz akçe ve nafaka-i iddet ve meûnet-i süknâm için dahi bi’t-terâzî yüz otuz sekiz akçe ki min-haysü’l-mecmû‘ altı yüz otuz sekiz akçeyi mezbûr İbrahim bana def‘ ü teslîm ben dahi yedinden ahz u kabz eylediğimden sonra hukūk-ı zevciyete ve târih-i kitâba gelince cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Ahmed b. Osman, Ali b. İvaz, el-Hâc Mehmed b. Ahmed ve gayruhum mine’l-huzzâr.