Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 399 Hüküm no: 442 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Arakil’in çeşitli eşyalarını Aksebet bt. Begos’a sattığı Mahmiye-i İstanbul’da Tahta Minâr[e] Mahallesiʼnde sâkin Ariton v. Arakil nâm zimmî meclis-i şer‘-i enverde yine mahalle-i mezbûrda sâkinelerinden Aksebet bt. Begos? nâm Nasrâniye tarafından husûs-ı âti’z-zikri tasdîka vekîl olduğu Karabet v. Kirkor ve Aritun v. Melkon nâm zimmîler şehâdetleriyle sâbit olan Toros v. Kiragos mahzarında ikrâr ve takrîr-i kelâm edip eşyâ-i memlûkemden üçer ayak bir çift zümrüd küpe ve yetmiş beş dirhem bir çift sim kuşak ve otuz vakıyye ( ) bi-safkatin vâhidetin mezbûre Aksebet’e altmış guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semen-i mezbûr altmış guruşu müvekkile-i mezbûre yedinden tamamen ahz u kabz eyledim min-ba‘d eşyâ-i muharrer[e]-i mezbûre müvekkile-i mezbûrenin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-ferd li-sene ihdâ ve işrîn ve miʼete ve elf. Şuhûdü’l-hâl: Abdullah Çelebi b. Hasan, Hasan Beşe b. Hasan, Hasan b. Abdullah, Mustafa Çelebi b. Şa‘ban ve gayruhum mine’l-huzzâr. Kaspar v. Mariri, Fezer v. Marat, Sahak v. Agop, Abraham v. Sefer