Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 400 Hüküm no: 443 Orijinal metin no: [60b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Hüseyin’in Edirne’de Abdurrahman Mahallesiʼndeki evini mehir bedeline mahsuben boşandığı karısı Rukiye bt. Ahmed’e sattığı Mahmiye-i İstanbul’da Ayasofya-i Kebîr Câmi‘-i şerîfi kurbünde sâkin Ahmed Beşe b. Hüseyin nâm kimesne meclis-i şer‘-i şerîf-i enverde zevce-i mutallakası işbu râfi‘atü’l-kitâb Rukiye bt. Ahmed nâm hatuna husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Mustafa b. Yusuf ve Süleyman [b.] Hüseyin şehâdetleriyle şer‘an sâbit olan Mustafa Ağa b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup Edirne’de Âişe Hatun han[ı] kurbünde Abdurrahman Mahallesiʼnde vâki‘ ve bir tarafdan Mehmed mülkü ve bir tarafdan Hamuli? Hüseyin Çelebi mülkü ve bir tarafdan yine mezbûr Hüseyin Çelebi bahçesi ve bir tarafdan tarîk-i âm ile mahdûd bir bâb tahtânî oda ve bir sofa ve havluyu müştemil mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Rukiye Hatun’a elli guruşa bey‘ ve teslîm ol dahi ber-vech-i meşrûh üzere iştirâ ve tesellüm ve kabûl eylediğinden sonra semeni olan meblağ-ı mezbûru müvekkile-i mezbûre Rukiye Hatun’a zimmetimde deynim olan elli guruş mehr-i müecceline takās eylediğimde ol dahi mukāssa ve kabûl eyledi fîmâ-ba‘d menzil-i mezbûrda alâkam kalmayıp müvekkile-i mezbûrenin mülk ve hakkı olup mahallinde kabza taslît eyledim keyfe mâ teşâ mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd li-sene ihdâ ve işrîn ve miʼete ve elf. Şuhûdü’l-hâl: Ali Çelebi b. Mehmed, Osman Ağa b. Mehmed, Mustafa Çelebi b. Ali, Süleyman Çelebi b. Mehmed, Ali Çelebi b. İvaz ve gayruhum mine’l-huzzâr.