Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 401 Hüküm no: 444 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa b. Ahmed’in arsasının yarısını Raziye bt. Mehmed’e sattığı Mahmiye-i İstanbul’da Mismârî Şücâ‘ Mahallesi sükkânından Molla Mustafa b. Ahmed nâm kimesne meclis-i şer‘-i şerîf-i enverde işbu sâhibetü’l-kitâb Raziye bt. Mehmed nâm hatun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Basmacı Osman Çelebi mülkü ve bir tarafdan el-Hâc Mustafa Çavuş mülkü ve bir tarafdan benim âhar mülküm ve bir tarafdan tarîk-i âm ile mahdûd tûlen ve arzen bi-hesâb-ı terbî‘î yetmiş üç zirâ‘ arsa üzerinde mebnî bir bâb fevkānî oda ve bir sofa ve bir bâb tahtânî oda ve bir kenîfi muhtevî mülk menzilimin nısf-ı şâyi‘ini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa mezbûre Raziye Hatun’a bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr yüz guruşu mezbûre Raziye Hatun yedinden tamamen ahz u kabz eyledim baʻde’l-yevm menzil-i mezbûrun nısf-ı şâyi‘i mezbûre Raziye Hatun’un mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 3 min-Recebi’l-ferd sene 1121 Şuhûdü’l-hâl: Ömer Efendi b. Şükrullah, Hüseyin Efendi b. Mahmud, Halil Çelebi b. Yusuf el-Müezzin, Monla Hüseyin b. Mustafa, el-Hâc Ali b. Abdullah, el-Hâc Mustafa b. Abdurrahman, el-Hâc Sinan b. Abdurrahim, Hasan Efendi b. Mustafa, Mustafa b. Gazanfer, Mustafa Çelebi b. Şa‘ban ve gayruhum mine’l-huzzâr.